Policia e Lezhës ka dhënë detaje të reja në lidhje me shpërthimin e pikës së karburantit në aksin rrugor Lezhë-Laç.
Siç njofton policia, në pikën e karburantit ka shpërthyer dhe ka marrë flakë një bombol gazi që shërbente për furnizimin me gaz të automjeteve.
Policia bën me dije se janë lënduar 5 shtetas që ndodheshin në mjetin që po furnizohej me gaz, konkretisht shtetasit me inicialet B. B. 36 vjeç, A. B. 33 vjeç, D. B. 33 vjeç, 2 vajza të mitura 5 dhe 2 vjeç dhe dy punonjës pranë karburantit, shtetasit N. P. vjeç 40 dhe P. L. vjeç 31, si dhe janë dëmtuar e djegur disa automjete që ndodheshin të parkuara.
Shtetasit N. P. dhe B. B. janë në gjendje më të rëndë dhe ndodhen në Spitalin e Traumës në Tiranë për ndihmë mjekësore më të specializuar.
Ndërsa të lënduarit e tjerë ndodhen në Spitalin Rajonal Lezhë jashtë rrezikut për jetën.
Menjëherë pas njoftimit të marrë për ngjarjen, forca të shumta policie dhe disa zjarrfikëse shkuan në vendngjarje, ku zjarrfikëset bënë të mundur fikjen e plotë të zjarrit, duke shmangur plotësisht rrezikun e përfshirjes nga flakët të depozitave të karburantit.
Policia mori masa duke vendosur perimetrin e sigurisë e largimin e të gjithë qytetarëve nga perimetri i sigurisë, si dhe bllokimin e aksit rrugor duke i menaxhuar e drejtuar për në akse të tjera lëvizjeje.
Nga hetimet paraprake, dyshohet se ngjarja ka qenë aksidentale, ndodhur nga një defekt teknik në sistemin e gazit.
Ndërkohë, vazhdon puna për hetimin e plotë të rrethanave të ngjarjes nga specialistët dhe ekspertët përkatës, për përcaktimin e saktë të shkaqeve të saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
