Gazeta Si – Një 24-vjeçar i përfshirë në një sherr masiv pasditen e të enjtes në Tropojë ka humbur jetën në spital si pasojë e goditjes me thikë.
Ngjarja ka ndodhur në një lokal në fshatin Breg-Lumë për motive të dobëta dhe policia thotë se kanë mbetur të plagosur edhe dy persona të tjerë.
Sipas policisë, një 40-vjeçar goditi me thikë 3 persona, një 45-vjeçar dhe 2 vëllezër të moshës 32 dhe 24 vjeç. Si pasojë e plagëve, 24-vjeçari humbi jetën në spital.
Për ngjarjen e rëndë policia arrestoi 5 persona. Ndërsa autori i dyshuar i vrasjes dhe plagosjes së dyfishtë u shpall në kërkim.
“Si rezultat i veprimeve të thelluara hetimore dhe policore të kryera menjëherë pas rastit të ndodhur më datë 11.07.2024, rreth orës 17:00, në një lokal në fshatin Breg-Lumë, ku për motive të dobëta, shtetasi S. S., 40 vjeç, plagosi me mjete prerëse, shtetasit V. P., 32 vjeç, Sh. K., 45 vjeç, si dhe vëllanë e shtetasit V. P., shtetasin A. P., 24 vjeç, i cili si pasojë e plagëve, humbi jetën në spital, u arrestuan shtetasit: A. Q., 39 vjeç, për veprat penale “Përkrahja e autorit të krimit” dhe “Moskallëzimi i krimit”; -Xh. M., 31 vjeç, për veprat penale “Veprime që pengojnë zbulimin e së vërtetës” dhe “Moskallëzimi i krimit”; -A. Sh., 34 vjeç, për veprën penale “Moskallëzimi i krimit”; -A. B., 29 vjeç, për veprën penale “Moskallëzimi i krimit”; -J. K., 34 vjeç, për veprën penale “Moskallëzimi i krimit”. Gjithashtu, vijojnë kërkimet intensive për kapjen e shtetasit S. S”, thuhet në një njoftim të policisë së Kukësit.
Policia thotë se vijojnë hetimet për të zbardhur rrethanat e plota të ngjarjes së rëndë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
