.png)
Pas dy javësh, Motor Show do të hapë dyert në Paris, një nga qytetet në Europë ku prezenca e makinave vlerësohet gjithnjë e më pak.
Në një intervistë të përbashkët të publikuar nga Le Parisien , Carlos Tavares, CEO i Stellantis dhe Luca De Meo, CEO i Renault, shprehin keqardhje për imazhin negativ të makinave dhe ndikimin në “lirinë e lëvizjes”.
“Pse kemi kaq shumë francezë të dashuruar me makinat e tyre në një vend thelbësisht autofobik?” pyet Carlos Tavares.
“Kam punuar në Gjermani, në Volkswagen dhe Audi. Atje ka një krenari në industrinë e automobilave që nuk ekziston në Francë”, shton Luca De Meo i cili vëren se makina nuk e ka më vendin e saj në qytet.
“Urrej” makinën, për ne ka “mbaruar loja”
Sipas dy liderëve, qytetet e projektuara shekuj apo dekada më parë nuk janë përshtatur me shpërthimin e lëvizshmërisë urbane.
“Disa njerëz – sepse vozitja sot nuk është aspak e lehtë dhe sepse në disa qytete dendësia e popullsisë është e paprecedentë – kanë filluar të mos i pëlqejnë makinat. Unë gjithmonë kam thënë se nëse njerëzit filluan të urrenin produktin tonë, ajo ishte mbarimi i lojës”, u shpreh me keqardhje shefi i Renault.
“Ne jemi në kontakt me një infrastrukturë e cila është një nga më të vjetrat në botë. Ajo është ndërtuar ndoshta 450 vjet më parë, shton Luca De Meo: “Të drejtosh makina në të është si të shikosh një film të Netflix në një telefon celular njëzet vjet më parë.”
Në të vërtetë, tani për prodhuesit, bëhet fjalë për propozimin e automjeteve elektrike për të zëvendësuar modelet termike. Qershorin e kaluar, Parlamenti Europian miratoi propozimin e Brukselit për të reduktuar në zero emetimet nga makinat e reja nga viti 2035 . Vetëm automjetet elektrike do të autorizohen për shitje, ndryshe nga makinat termike dhe hibride. Por për drejtuesit, këto vendime nuk marrin parasysh realitetet.
“Është për të ardhur keq, gjithsesi, që e kemi marrë temën me kokë poshtë, duke filluar nga prodhimi i makinave, e duke lënë mënjanë çështjen e energjisë dhe atë të infrastrukturës”, deklaron Carlos Tavares.
Një forum për “lirinë e lëvizjes”
Pyetja bazohet edhe në biletën për të përballuar një automjet elektrik.
Për të përballuar një të tillë, çmimet variojnë nga rreth 20.000 për një makinë të vogël brenda qytetit, në gati 100.000 euro.Tarifa që shumica e shoferëve nuk mund t’i përballojnë.
“Nëse makinat elektrike janë të shtrenjta, ato do të jenë elitare, shtresa e mesme nuk do të mund t’i aksesojë ato dhe do të kemi një problem stabiliteti social. Meqë ra fjala, nëse nuk marrim vëllime të mjaftueshme, nuk do të kemi asnjë ndikim në planet”, vëren Carlos Tavares.
“Ne jemi ende në një fazë të përparimit teknologjik, gjatë së cilës, sipas definicionit, produktet e reja janë të shtrenjta. Sot, njerëzit e privilegjuar që kanë mjetet dhe një garazh në shtëpi mund të përballojnë një automjet elektrik”, shton Luca De Meo, duke premtuar “demokratizimin e automjetit elektrik”.
A do ta gjejë vendin e saj makina elektrike për të gjithë në trafikun urban? Është një dyshim i ngritur nga Carlos Tavares.
“Kur kemi vetëm makina të sigurta dhe të përballueshme, a do të vazhdojmë të ushtrojmë presion mbi automobilin?”
“Ne jemi këtu për të propozuar zgjidhje, me kusht që shoqëria të pranojë që liria e lëvizjes individuale, familjare dhe profesionale të mbetet një bosht themelor i ‘stilit’ tonë të jetesës. Që kjo temë të debatohet, ne do të krijojmë një forum për lirinë e lëvizjes”, njoftoi shefi i Stellantis.
“Nëse doni, unë marr pjesë”, ofron Luca De Meo. “Sigurisht, unë ju ftoj!” u përgjigj Carlos Tavares.
Burimi: BFM Business/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
