Gazeta Si – Për pesë vjet, Departamenti i Drejtësisë i SHBA-ve, e ka drejtuar gishtin nga Nicolas Maduro, duke e akuzuar atë si udhëheqjen e Cartel de los Soles, “Karteli i Diejve”, i konsideruar si një nga organizatat më të fuqishme të trafikut të drogës në Amerikën Latine.
Tani, mes heshtjes së plotë të administratës, kjo akuzë është tërhequr në mënyrë sensacionale në dokumentet e hartuara dhe të publikuara nga Prokurorja e Përgjithshme, Pam Bondi.
Kjo ndodh, edhe sepse, siç kanë pohuar prej kohësh ekspertët e krimit të organizuar, karteli thjesht nuk ekziston.
Akuza e re kundër Maduros – Së pari, në aktakuzën e vitit 2020, pastaj në ri-akuzën e urdhëruar nga Trump korrikun e kaluar 2025, Nicolas Maduro u identifikua qartë në dokumentet e Departamentit të Drejtësisë si udhëheqësi i padiskutueshëm i një organizate masive të trafikimit të drogës.
Një kartel aq i fuqishëm, saqë fitoi përfshirjen e tij në listën e organizatave terroriste të Shtëpisë së Bardhë, të cilën e përditëson periodikisht.
Ky përshkallëzim i akuzave pritej të theksohej dhe të shfaqej në mënyrë të spikatur në aktakuzën, të publikuar të shtunën, më 3 janar.
Megjithatë, nuk kishte asnjë gjurmë të saj: Maduro u përshkrua si një figurë kyçe në një “sistem të korruptuar dhe klientelist” të ushqyer nga droga dhe paratë.
Dhe, si me magji, nga 32 herë që Karteli i Diejve u përmend në aktakuzat e mëparshme, referencat për kartelin e dyshuar janë reduktuar në vetëm dy.
Çfarë është Cartel de los Soles? – Sipas rindërtimeve të ekspertëve, Karteli i Diejve nuk ekziston. Ose më saktë, nuk është një organizatë e vetme, por një emër i vetëm që përdoret në Venezuelë për të identifikuar grupe të panumërta të vogla kriminale, të lidhura me ushtrinë dhe të përfshira në aktivitete të ndryshme të paligjshme: nga kontrabanda e benzinës, te minierat e paligjshme, e deri te trafikimi i drogës.
Prandaj, nuk është një strukturë e organizuar vertikalisht, por një rrjet informal qelizash ushtarake, nga më të ulëtat te më të lartat, të cilat menaxhojnë dhe rregullojnë në mënyrë efektive trafikimin brenda vendit pa ndonjë lidhje të qartë me njëra-tjetrën.
Termi Cartel de los Soles, jo rastësisht, u shpik për herë të parë në vitin 1993, kur dy gjeneralë të njësisë anti-drogë të ushtrisë u hetuan për trafik droge.
Si komandantë brigade, ata mbanin një diell në të dy rripat e shpatullave të uniformave të tyre kamuflazh. Që nga ky moment e tutje, venezuelianët i referohen njësive të korruptuara të ushtrisë me këtë emër.
Akuza e riformuluar – Dhe kështu, duke ndjekur pikërisht këtë përkufizim, Departamenti i Drejtësisë ka përshtatur gjithashtu akuzat kundër ish-presidentit të Venezuelës.
Nicolas Maduro akuzohet për grumbullimin e fitimeve nga dhe mbrojtjen e trafikantëve të shumtë të drogës, të përcaktuar si “zyrtarë të korruptuar civilë, ushtarakë dhe të inteligjencës, që veprojnë në një sistem patronazhi të menaxhuar nga ata në krye, një referencë për emblemën e diellit që varet nga uniformat e zyrtarëve të lartë ushtarakë të Venezuelës”.
Ky përkufizim mund ta minojë vetëm fatalisht përcaktimin e kartelit të dyshuar si një organizatë terroriste.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
