Gazeta Si – Të gjithë i besuan Markus Fritsche. Ai punoi si oficer sigurie në fabrikën e “Mercedes Benz” në Dusseldorf, më pas vjen thirrja nga familja Schumacher në mars 2012, një vit e gjysmë përpara aksidentit të tmerrshëm të pistën e skive të legjendës F1 – 7 kampionate botërore dhe 91 gara të fituara në 19 sezpne të shkëlqyera, për një pasuri të vlerësuar në gjysmë miliardë euro – i cili nuk është shfaqur kurrë në publik që nga ajo kohë, nën kujdesin 24 orë në ditë nga gruaja e tij Corinna, e cila është shumë e vëmendshme ndaj privatësisë.
Për tetë vite askush nuk kishte asnjë dyshim për besnikërinë e 53-vjeçarit, të cilit iu dha akses i privilegjuar në aspektet më private të procedurave mjekësore të ish-pilotit.
Por kur familja e gjermanit vendosi të bënte ndryshime në regjimin e mirëqenies duke e njoftuar për shkarkimin e tij, Fritsche hartoi një plan të përpunuar shantazhi për të cilin tani rrezikon të paktën katër vjet burg.
Vjedhja e disqeve me 1.500 imazhe dhe 200 video
Në orët e fundit janë zbardhur detajet dhe objektivi, zhvatja e 15 milionë eurove nga familja Schumacher, duke kërcënuar me publikimin e fotove shumë personale të ish-kampionit në “dark web”.
Fritsche dyshohet se rekrutoi një mik prej kohësh, Yilmaz Tozturkan (një roje sigurie në një klub nate) dhe djalin e këtij të fundit, një ekspert kompjuteri, për të marrë në dorë 1.500 imazhe, 200 video dhe shënime të detajuara mjekësore.
Pjesa më e madhe e këtij materiali tepër të ndjeshëm do të ishte mbyllur në katër disqe USB dhe dy hard disk që Fritsche do t’i kishte hequr nga vila e Schumacher sapo të kuptonte se ata do t’i kishin kërkuar të largohej prej andej.
Shantazh dhe arrestim
Mëngjesin e 3 qershorit, Tozturkan kontaktoi familjen Schumacher përmes një numri anonim, duke treguar se kishte foto dhe video.
Në të njëjtën kohë, djali i tij, Lins, dërgoi katër imazhe në rezidencën e ish-pilotit, duke paralajmëruar të gjithë stafin e gjermanit se nga ajo kohë do të kishin një muaj kohë për të mbledhur 15 milionë euro për t’u paguar në dy këste, me penalitet publikimi të imazheve në ueb.
Megjithatë, vetëm një javë më vonë, Tozturkan dhe djali i tij u arrestuan nga policia gjermane pasi u vunë nën vëzhgim.
Çfarë rrezikojnë
Tozturkan aktualisht ndodhet në paraburgim, ndërsa djali i tij dhe Fritsche, i cili jeton në Wulfrath, janë të lirë me kusht.
Në seancën e muajit të ardhshëm, gjyqtarja Birgit Neubert do të vendosë nëse ka prova të mjaftueshme për të vazhduar me çështjen.
Tashmë janë caktuar katër data për seanca të mëtejshme, e fundit prej të cilave është shkurti i ardhshëm. Prokurorët kërkojnë të paktën katër vjet burg, por gjyqtari mund të zgjedhë edhe dënime më të gjata.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
