.png)
Gazeta Si – Një sasi prej 41 kg e 700 gram lëndë narkotike heroinë është sekuestruar nga policia këtë të shtunë.
Gjatë operacionit “Fusha e Kuqe”, u arrestua në flagrancë shtetasi Armando Papa 31 vjeç, banues në Fushë Kuqe, Kurbin, me precedente të tjera penale në fushën e drogës dhe jo vetëm, i cili në këtë rast dyshohet se është “korrier” për transportin e heroinës.
Në afërsi të rrethrrotullimit të aerportit të Rinasit, policia e ndaloi për kontroll makinën ku në bagazhin e saj gjeti edhe lëndën narkotike.
Ndërsa është shpallur në kërkim një tjetër person, R.G., banues në Sukth, i cili ka qenë në një tjetër makinë gjatë momentit të ndërhyrjes për arrestimin dhe ka mundur të largohet.
Gjatë kontrollit në automjetin tip “Benz”, u gjet në bagazh një kuti me 62 pako brenda së cilave kishte 41 kg e 700 gram lëndë të dyshuar narkotike heroinë, të cilat u sekuestruan në cilësinë e provës materiale së bashku me automjetin dhe 1 mjet prerës.
Sipas burimeve paraprake, Papa ka kyçur gojën para hetuesve gjatë dëshmisë së marrjes në pyetje. I riu nuk ka treguar asgjë mbi bashkëpunëtorë të tjerë të mundshëm dhe as destinacionin për ku ishte nisur për të dërguar lëndën narkotike.
Sasia e heroinës së sekuestruar kap vlerën e mbi gjysmë milioni Euro në treg, nëse do të ishte shitur. Burime nga policia bëjnë me dije se origjina e lëndës narkotike dyshohet se ishte nga Turqia.
Për arrestimin e tij, policia thotë se ka pasur informacione të marra në rrugë operative dhe janë vënë në ndjekje të mjetit sapo e kanë lokalizuar atë. Ndjekja ka përfunduar në afërsi të rrethrrotullimit të aeroportit ku u bë ndalimi i “Benzit” në fjalë dhe sekuestrimi i sasisë së konsiderueshme të heroinës.
“Nga specialistët për hetimin e Narkotikëve në Drejtorinë Vendore të Policisë Tiranë, në bashkëpunim me Prokurorinë e Rrethit Gjyqësor Tiranë, vijojnë hetimet e thelluara për identifikimin e shtetasve të tjerë të implikuar në këtë veprimtari kriminale“, njoftoi policia.
Materialet procedurale i kaluan Prokurorisë pranë Gjykatës së Rrethit Gjyqësor Tiranë për veprime të mëtejshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
