Kancelari gjerman Olaf Scholz i bëri thirrje kombit të shfaqë unitet dhe optimizëm për vitin 2025 në fjalimin e tij të Vitit të Ri, edhe pse ai po përballet me një sërë krizash dhe presion të madh përpara zgjedhjeve të parakohshme.
“Forca vjen nga solidariteti. Dhe ne jemi një vend që qëndron i bashkuar”, tha Scholz në fjalimin e tij.
Ai tha se popullsia e kishte shfaqur këtë në një mënyrë mbresëlënëse pas incidentit vdekjeprurës në tregun e Krishtlindjeve në Magdeburg, në të cilën pesë persona vdiqën dhe më shumë se 200 u plagosën.
Scholz falënderoi të gjithë punonjësit e urgjencës, infermierët dhe mjekët për punën e tyre pas sulmit të 20 dhjetorit.
Oficerët e policisë dhe punonjësit e shpëtimit u përgjigjën në mënyrë profesionale gjatë asaj që ai e përshkroi si një “natë tmerri”.
Njerëzit në tregun e Krishtlindjeve gjithashtu u ofruan spontanisht për të ndihmuar.
“Kështu jemi ne. Kështu është Gjermania. Ne nuk jemi një vend antagonizmi, as keqkuptimi. Por një vend i bashkimit”, tha Scholz.
“Ne mund të marrim forcë nga kjo – veçanërisht në kohë të vështira si këto”, tha ai, duke iu referuar ekonomisë së dobët të vendit, rritjes së çmimeve dhe luftës ruse kundër Ukrainës, e nisur gati tre vjet më parë.
Përballë shqetësimeve të tilla, Scholz sugjeroi se nuk është çudi që shumë po vënë në pikëpyetje të ardhmen e Gjermanisë.
“Solidariteti ynë na bën të fortë”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
