Sa kohë kemi që puthemi?

Nga Gazeta Si - Puthja më e vjetër në botë? Ajo daton 4500 vjet më parë, në Mesopotami (tani zona midis Irakut dhe Sirisë). Edhe pse zakoni i puthjes në buzë është gjurmuar deri më tani në Azinë Jugore 3500 vjet më parë, një studim e shtyn këtë praktikë të paktën 1000 vjet më para. Ajo ishte tashmë e përhapur dhe e vendosur mirë në Mesopotami 4500 vjet më parë.

Puthja ka ardhur njëkohësisht në kultura të ndryshme në të njëjtën kohë, kështu që nuk është një traditë ekskluzive për një rajon të botës. Këto janë përfundimet e studimit të botuar në “Science” të kryer nga Troels Pank Arbøll i Universitetit të Kopenhagës dhe nga Sophie Lund Rasmussen nga Universiteti i Oksfordit.

Shkenca e lashtë e puthjes - “Studimi i pllakave prej balte, me relieve dhe mbishkrime me karaktere kuneiformë që datojnë 4500 vjet më parë, dëshmon se puthja në buzë ishte pjesë e jetës së përditshme në Mesopotaminë e lashtë: si një praktikë në marrëdhëniet e dashurisë dhe si një gjest miqësie. Prandaj është një zakon shumë më i vjetër se sa mendohej deri më tani”, thotë profesor Troels Pank Arbøll, një ekspert në historinë e mjekësisë në Mesopotami.

Në konfirmim të kësaj hipoteze, biologia e kafshëve, Sophie Lund Rasmussen shton: “Kërkimet mbi bonobos dhe shimpanzetë, ‘të afërmit e gjallë’ më të afërt të njeriut, kanë treguar se të dyja speciet putheshin, gjë që na bën të nxjerrim përfundimin se praktika e puthjes është një sjellje themelore te njerëzit, prandaj gjendet në të gjitha kulturat”.

Transkulturore - Edhe romakët e lashtë e përdornin puthjen si një formë përshëndetjeje, ndërsa gjesti kishte një kuptim të fortë të vëllazërisë mes hebrenjve: këtu njerëzit putheshin në gojë edhe mes njerëzve të së njëjtës gjini. Puthja më e famshme në histori? Ajo që Juda i dha Jezusit. Në mesjetë ajo mori një konotacion respekti dhe besnikërie: në Kanto VIII të Ferrit gjejmë puthjen në fytyrën e Dantes nga Virgjili. Gjithashtu, gjatë së njëjtës periudhë, krerët e fraksioneve armike lidhën aleanca dhe vendosën armëpushime në betejë duke dhënë një puthje në gojë.

Vektor i sëmundjeve - Përveç rëndësisë së saj për sjelljen sociale dhe seksuale, praktika e puthjes mund të ketë luajtur një rol të paqëllimshëm në transmetimin e mikroorganizmave, duke u bërë shkaku i mundshëm i përhapjes së viruseve midis njerëzve, si ai i Herpes Simplex 1.

“Ekziston një numër i madh tekstesh mjekësore që datojnë që nga Mesopotamia e lashtë, të cilat përmendin një sëmundje të quajtur buʾshanu, me simptoma të ngjashme me ato të herpes simplex 1: një infeksion që u zhvillua kryesisht me flluska në ose rreth gojës dhe në fyt”, vëren profesor Arbøll.

Vende të ndryshme ... Edhe pse shumë e dekurajuar në epokën e Covid-it, puthja në faqe si një formë përshëndetjeje është e përhapur në të gjithë botën, por secili vend krenohet me rituale dhe tradita të ndryshme. Janë tri puthje për t’u shkëmbyer në vendet e lidhura me krishterimin ortodoks, si Ukraina dhe Serbia, por edhe në Holandë, Belgjikë, Zvicër dhe Poloni, është e domosdoshme të arrish në tre. Në Francë, nga ana tjetër, numri ndryshon nga rajoni në rajon: katër në disa zona veri-perëndimore, deri në pesë në disa zona të vogla të Korsikës.

Mes burrave - Shtetet e Europës Veriore, tradicionalisht të prirura ndaj kontakteve fizike mes të huajve, janë të kujdesshëm ndaj puthjeve të burrave. Në vendet myslimane, megjithatë, pritet që burrat të puthen, por është e ndaluar puthja e grave në publik. Deri në vitet 1990, puthjet në buzë mes burrave ishin të përhapura edhe në BRSS, siç kujtojnë pamjet e takimeve mes liderëve komunistë gjatë viteve të Luftës së Ftohtë (1947-1991). /Il Focus/