.png)
Rregulloret e propozuara të Bashkimit Europian për asetet e kriptove nuk shkojnë aq larg sa duhet dhe duhet të forcohen masat mbrojtëse për t’u paraprirë rreziqeve, tha të mërkurën anëtarja e bordit mbikëqyrës të Bankës Qendrore Europiane, Elizabeth McCaul.
Parlamenti Europian do të votojë për projekt-ligjin për Tregjet e Aseteve Kripto (MiCA) më vonë këtë muaj, duke bërë një hap të madh në sigurimin e mbikëqyrjes së botës së kriptove pas një sërë skandalesh dhe falimentimesh.
“Ndërsa standardi i ri i Bazelit dhe MiCA janë piketa të rëndësishme, kam frikë se nuk do të jenë të mjaftueshme”, tha McCaul në një postim në blog.
“Në përputhje me parimin e proporcionalitetit, ofruesit e rëndësishëm të shërbimeve të kripto-aseteve duhet t’i nënshtrohen kërkesave më të rrepta dhe mbikëqyrjes së zgjeruar: asnjëra nga të dyja nuk parashikohet nga MiCA,” argumentoi ajo.
Një çështje tjetër është se si matet madhësia e ofruesve të shërbimeve të kripto-aseteve, sepse platforma e kriptove FTX nuk do të ishte llogaritur si e rëndësishme duke pasur parasysh se si ishte organizuar firma.
“Në fakt Binance, i cili është lojtari më i madh i kriptove, supozohet se ka midis 28 dhe 29 milionë përdorues aktivë në mbarë botën, por ndoshta nuk do të përmbushte as pragun për t’u klasifikuar si i rëndësishëm në BE”, tha McCaul.
Bota e kriptove është tronditur nga dështime të profilit të lartë, falimentime dhe mashtrime gjatë vitit të kaluar, por vlera e shumë aktiveve është rritur ende muajin e kaluar pasi shqetësimet për shëndetin e sektorit bankar i shtynë disa të largohen nga depozitat bankare. .
McCaul argumentoi se nevojiten metrika të reja sasiore që mund të marrin parasysh llojin e biznesit, si vëllimi për platformat e tregtimit ose asetet nën kujdestari për bizneset kujdestare.
Ajo tha se pragjet duhet të maten në nivel grupi dhe jo në nivel entiteti individual, duke pasur parasysh kompleksitetin e operacioneve. E njëjta gjë vlen edhe për konfliktet e interesit, të cilat duhet të identifikohen në të gjithë grupin dhe në entitetet e lidhura, tha McCaul./Reuters
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
