.png)
Gjykata e Lartë ka vendosur që ish-ministri i Brendshëm, Saimir Tahiri dhe ish-kreu i Policisë së Vlorës, Jaeld Çela, të dalin para gjykatës në 28 shtator ora 10:00.
Si ish-ministri, ashtu edhe ish-polici, kundërshtojnë vendimin e Gjykatës së Apelit për Krime të Rënda, për kthimin e çështjes së tyre për rigjykim.
Sipas vendimit të Apelit, çështja e tyre duhet të rihetohet dhe rigjykohet nga Gjykata e Shkallës së Parë, duke rrëzuar dhe vendimin që kjo gjykatë kishte parë duke dënuar Tahirin për shpërdorim detyre.
Edhe akuzat e ngritura nga Prokuroria janë rrëzuar dhe kjo çështje do të duhet të hetohet nga fillimi dhe të gjykohet nga një tjetër trupë gjyqësore.
Sajmir Tahiri dhe ish-kreu i Policisë së Vlorës, akuzohen se kanë shpërdoruar detyrën duke lejuar mbjelljen e kanabisit në qarkun e Vlorës dhe se kanë lidhje me grupin “Habilaj”.
Gjykata e Krimeve të Rënda e ka dënuar ish-ministrin Tahiri me 5 vite heqje lirie, por ky vendim është konvertuar në shërbim prove për 3 vite, nën akuzën e shpërdorimit të detyrës.
Për Tahirin, dikur krahu i djathtë i kryeministrit Rama, Prokuroria e Krimeve të Rënda kërkoi 12 vite burg.
Prokuroria e akuzoi ish-ministrin për tre vepra penale: “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”, ndërkohë që Gjykata e dënoi për një akuzë që nuk ishte ngritur zyrtarisht nga prokuroria.
Tahirit i është ndaluar gjithashtu për tre vite marrja e posteve publike, dhe për këtë ai bëri rekurs të vendimit në Gjykatën e Lartë.
Edhe Çela, kërkon rrëzimin e vendimit të Krimeve të Rënda që e dënuan atë me 3 vite dhe 4 muaj burg, por me ndryshim nga ish-ministri i Brendshëm, ish-drejtori duhet t’i vuajë ato në burg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
