.png)
Ministri i ri i Shqipërisë, që do të merret me Prokurimet Publike do të jetë i paprekshëm nga korrupsionet, kërcënimet dhe tentativat për favorizime. Kjo sepse, Diella, siç e ka emrin, është një bot i gjeneruar me AI.
Kryeministri Edi Rama, i cili do të fillojë mandatin e tij të katërt, tha të enjten se Diella, që do të thotë “diell” në shqip, do të menaxhojë dhe do të japë të gjithë tenderët publikë në të cilët qeveria kontrakton kompani private për projekte të ndryshme.
“Diella është anëtari i parë i kabinetit që nuk është fizikisht i pranishëm, por është krijuar virtualisht nga AI”, tha Rama gjatë një fjalimi për zbulimin e kabinetit të tij të ri. Ajo do të ndihmojë që Shqipëria të bëhet “një vend ku tenderët publikë janë 100% pa korrupsion”.
Dhënia e kontratave të tilla ka qenë prej kohësh një burim skandalesh korrupsioni në Shqipëri, një vend ballkanik që ekspertët thonë se është një qendër për bandat që kërkojnë të pastrojnë paratë e tyre nga trafikimi i drogës dhe armëve në të gjithë botën, dhe ku ryshfeti ka arritur në korridoret e pushtetit.
Ky imazh ka komplikuar anëtarësimin e Shqipërisë në Bashkimin Europian, të cilin Rama dëshiron ta arrijë deri në vitin 2030, por që analistët politikë thonë se është ambicioz.
Qeveria nuk dha detaje se çfarë mbikëqyrjeje njerëzore mund të ketë për Diella-n, ose nuk adresoi rreziqet që dikush mund të manipulonte robotin e inteligjencës artificiale.
Diella u lançua fillimisht në fillim të këtij viti si një asistent virtual i fuqizuar nga AI në platformën e-Albania, duke ndihmuar qytetarët dhe bizneset të marrin dokumente shtetërore. E veshur me veshje tradicionale shqiptare, ajo ofron ndihmë përmes komandave zanore dhe lëshon dokumente me pulla elektronike, duke reduktuar vonesat burokratike.
Jo të gjithë janë të bindur. Një përdorues i Facebook tha: “Edhe Diella do të korruptohet në Shqipëri”. Një tjetër tha: “Vjedhja do të vazhdojë dhe Diella do të fajësohet”.
Parlamenti i ri, i zgjedhur në maj, është planifikuar të mblidhet të premten, megjithëse mbetet e paqartë nëse qeveria do të votohet në të njëjtën ditë./Reuters
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
