Vendi ynë është përfshirë nga reshje të dendura shiu që prej ditës së djeshme dhe kjo është shoqëruar me probleme në disa qytete të vendit.
Probleme janë hasur në qytetin e Durrësit ku janë përmbytur disa nga rrugët kryesore, si rruga “Aleksandër Goga”, nga Spitali tek Muzeu i Dëshmorëve, lagjja numër 5, zona tek stadiumi dhe rrethrrotullimi i stacionit të trenit.
Momentalisht situata është jo shumë problematike, pasi nuk ka reshje të mëdha.
Ndërkohë reshjet e shiut kanë sjellë probleme edhe në aksin Elbasan-Librazhd.
Mësohet se për shkak të reshjeve intensive, gjatë natës ka pasur rënie gurësh në aksin Elbasan -Librazhd duke vështirësuar qarkullimin.
Si pasojë e reshjeve të dendura në rrethin e Fushë Krujës është rritur ndjeshëm niveli i lumit Ishëm duke rrezikuar përmbytje në fshatrat Murqine, Mallkuc, Bilaj dhe Mazhe. Në fshatin Murqine ky lumë ka dalë nga shtrati aktualisht duke përmbytur disa hektarë tokë bujqësore.
Edhe në Kukës, reshjet e shiut kanë sjellë sërish rënie gurësh në rrugët e qarkut duke vështirësuar qarkullimin. Prefektura Kukës në njoftimin e saj zyrtar thotë se si rezultat i kushteve të motit në bashkitë e Qarkut Kukës situata aktualisht është e qetë dhe nuk ka emergjencë.
“Rrugët nacionale janë të qarkullueshme normalisht, ka pasur rënie inertesh në segmente të ndryshme, por firmat kontraktore po punojnë për mbajtjen në gatishmëri të tyre. Rrugët bashkiake janë të qarkullueshme normal”, thuhet në njoftimin e Prefekturës Kukës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
