.png)
Rekordet vendosen për t’u thyer dhe shpesh ndodh që shumë prej tyre zhduken thellë në kujtime, ndërsa disa rekorde mbeten të skalitur fort në historinë e sportit. Janë ato rekorde që më parë mendoheshin të paarritshëm, por limitet kalohen dhe një herë të vetme një person i vetëm është vetë perfeksioni. Rezultatet janë të paharrueshëm, pasi thyejnë edhe ligjet e shkencës.
10-a absolute
“Nëna” e këtyre lloj rekordesh në sport na kthen 42 vite më pas, në Lojërat Olimpike të Monrealit, kur Nadia Komaneçi mahniste botën me mrekullitë e saj në paralelet asimetrike. Ajo u bë gjimnastja e pare në botë që mori vlerësimin absolut me notën 10 në një garë olimpike. Vlerësimi maksimal, perfeksioni, përtej të cilit nuk ka asgjë. Në ato lojëra, 14-vjeçarja rumune garoi edhe 6 herë të tjera, duke marrë medaljen e artë. Në fakt, 10-ën e parë e kishte marrë katër muaj më parë në “American Cup”, në Nju jork, por ajo që bëri në Montreal e futi në memorien e gjithë botës dhe mbetet ende një legjendë, një ikonë e gjimnastikës, më e famshmja e të gjitha kohërave, edhe pse palmaresi i saj nuk është shumë i pasur, për shembull, aq sa i ukrainases Larisa Latinina.
Rekordet e “Mbretëreshës”
Kalojmë tek atletika, ku rekordet janë esenca e këtij sporti. Të gjithë e konsiderojnë “Mbretëresha” e sportive, sepse në atletikë jetohet me numrat dhe medaljet. Në analet e historisë së atletikës spikasin koha e parë poshtë 10 sekondave në 100 metra nga amerikani Xhim Hines, i cili regjistroi kohën 9 sekonda e 95 të qindtat në Lojërat e Meksiokos në vitin 1968, kërcimi i parë në 6 metra i “carit” ukrainas Sergej Bubka në kërcimin me shkop, më 13 korrik të 1985-ës në Paris, si dhe 2 metrat e kaluara në kërcimin së larti nga gjermanja Rosmari Akerman më 26 gusht 1977. Po aashtu, spikat “moment magjik” i Sër Roxher Banister më 6 maj 1954, në pistën me dhe të “Oxford University”. Stedenti i mjekësisë, që kishte mbetur jashtë podit në 1500 metra dy vjet më parë në Helsinki, kaloi atë që edhe shkenca në atë kohë e konsideronte të pakalueshme. Ai vrapoi 1609,35 metra për 3 minuta, 59 sekonda dhe 4 të qindtat, duke u bërë atleti i parë që zbriste poshtë 4 minutave, duke thyer një tabu, por vetëm 46 ditë më pas rekordi i tij u thye nga australiani Xhon Landi, kurse një vit më pas shumë atletë regjistruan kohë poshtë 4 minutave.
100 pikë
Askush ende nuk ka arritur të imitojë Vilt Çambërlein, një nga basketbollistët më të mëdhenj të të gjitha kohërave një makinë e frikshme koshash, që mban disa rekorde, por njëri është i rrallë dhe që reziston prej më shumë se një gjysmë shekulli dhe kosnderohet i paarritshëm. Ishte data 2 mars 1962, kur në Hershei (Pensilvani) Çambërlein shënoi 100 pikë në ndeshjen, ku skuadra e tij, Filadelfia Uarriors, mundi 169-147 Nju Jork Kniks. Dhe të mendosh që në atë kohë nuk ishte ende gjuatjtja për 3 pikë. Pikshënuesi më i mirë pas Çambërlein në një ndeshje është i madhi Kobi Brajant, i cili është ndalur në kuotën e 81 pikëve në një ndeshje. Kuptohet qërtë se sa peshon ai rekord. Ende nuk ka lindur një Çambërlein i ri.
Femra e parë
Mbeten ndërkohë të pathyeshëm disa rekorde, thjesht se janë unikë. Si ai i Roberta Gib, 25-vjeçarja nga Masaçusets, që më 19 prill 1966 vrapoi në mënyrë klandestine Maratonën e Bostonit, duke u bërë e para femër që ka shkuar deri në fund të 42 kilometrave e 195 metrave. Asaj ia kishin mohuar regjistrimin për të vrapuar në këtë maratonë. “Vrapimi është vetëm për meshkujt, pasi femrat nuk janë në gjendje fizike të vrapojnë në një maratonë”, - i kishin thënë organizatorët e maratonës. Ajo nuk u demoralizua, veshi uniformën e të vëllait, u fsheh në një shkurre para se të bëhej nisja dhe më pas u përzje me 540 pjesëmarrësit në garë. Vuajti jashtëzakonisht shumë dhe shkoi në finish me këmbët e gjakosura nga këpucët e papërshtatshme. Por ia doli. Nuk është një rekord në kuptimin e parë të fjalës, por nëse ky nuk është një gur në historinë e sporteve…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
