Akademia “Globe Soccer” mbajti edicionin e 15-të në Dubai. Cristiano Ronaldo dhe Lionel Messi nuk u përfshinë mes kandidaturave për Topin e Artë por nuk munguan mes kandidaturave në mbrëmjen e Dubait. Në rastin e portugezit, përfshirja e tij lidhet me ish agjentin Jorge Mendes si një prej themeluesve të Akademisë. Mendes triumfoi sërish në kategorinë e “Agjentit më të Mirë” duke e fituar çmimin për të 12 herë.
Në Finale mbërritën 18 kandidatë për çmimin e Futbollistit më të Mirë. Ndërsa ishin vetëm 12 finaliste për çmimin e Futbollistes më të Mirë. Fituesi i Topit Të Artë, Rodri dhe Lojtari i Vitit sipas FIFA-s, Vinicius Junior, ishin sërish mes finalistëve por ashtu si në Riad edhe në Dubai, triumfoi futbollisti i Realit të Madridit, skuadra që mori shumicën e çmimeve të mbrëmjes.
Nuk mbeti pas Barcelona me superyllin Aitana Bonmati e cila realizoi “Triple-tën”. Pas Topit të Artë dhe Çmimit si Lojtarja e Vitit nga FIFA, ajo u shpall më e mira edhe nga Akademia “Globe Soccer”.
Presidenti i Realit të Madridit, Florentino Perez mori një vlerësim për karrierën duke u quajtur “Presidenti më i Mirë i të gjitha kohërave”. Ish lojtari i Anglisë dhe Manchester United, Rio Ferdinand, Alessandro Del Piero (Itali-Juventus), Neymar (Brazil-Al Hilal) dhe Thibaut Courtois (Belgjikë-Real Madrid) u vlerësuan për arritjet në karrierën e tyre të suksesshme.
Nuk mund të mbetej jashtë mbrëmjes Cristiano Ronaldo që mori një çmim special si Shënuesi më i Mirë i të gjitha kohërave, në ndeshje zyrtare. Gjatë këtij viti Ronaldo kaloi shifrën e 900 golave në karrierë.
Këta ishin fituesit e mbrëmjes Gala nga Akademia “Globe Soccer”:
- Futbollisti më i Mirë (18 finalistë): Vinicius Junior (Real Madrid)
- Mesfushori më i Mirë (11 kandidatë): Jude Bellingham (Real Madrid)
- Sulmuesi më i Mirë (10 kandidatë): Vinicius Junior (Real Madrid)
- Futbollistja më e Mirë (12 finalistë): Aitana Bonmati (Barcelona)
- Skuadra më e mirë për meshkuj (10 finalistë): Real Madrid
- Skuadra më e Mirë për femra (4 finalistë): Barcelona
- Traineri më i Mirë (7 finalistë): Carlo Ancelotti (Real Madrid)
- Lojtari i Ri më i Mirë (7 finalistë): Lamine Yamal (Barcelona)
- Agjenti më i Mirë (7 kandidatë): Jorge Mendes
- Drejtori Sportiv më i Suksesshëm (6 kandidatë): Piero Ausilio (Inter Milano)
- Futbollisti më i Mirë në Lindjen e Mesme (5 finalistë): Cristiano Ronaldo (Al Nassr)
- Traineri më i Mirë në Lindjen e Mesme: Jorge Jesus (Al Hilal)
- Skuadra më e Mirë në Lindjen e Mesme (4 finalistë): Al Ain
- Skuadra surprizë: Olympiacos
- Çmimi Maradona: Jude Bellingham (Real Madrid)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
