Nga Gazeta Si- Ndërsa prisnin të nisë seanca plenare, ku në rend dite ishte edhe miratimi i ndryshimit të ligjit për zonat e mbrojtura, jashtë ambienteve të Kuvendit, përfaqësues të shoqërisë civile protestuan për të kundërshtuar ligjin.
Me banderolë në duar me mbishkrimin “mos votoni pr/ligjin masakrues për zonat e mbrojtura”, ata bënë thirrje që të mos kalojë në votim.
Prej kohësh shoqëri civile dhe organizata mjedisore janë shprehur kundër këtij projektligji që i jep bashkive dhe Ministrisë së Mjedisit kompetencat për të lejuar ndërtimet në zonat e mbrojtura.
Më herët, përfaqësues të organizatave kanë thënë se do vijojnë me kundërshtimin edhe nëse projektligji miratohet në Kuvend.
Pas miratimit të ligjit për zonat e mbrojtura, ka reaguar edhe delegacioni i BE duke thënë se “Në kuadrin e negociatave të anëtarësimit, miratimi i ligjeve mbi çështje që mbulohen nga legjislacioni i BE-së presupozon konsultim publik të mirëfilltë dhe gjithëpërfshirës, si dhe një proces të parashikueshëm dhe transparent”, duke shtuar edhe se delegacioni i BE-së do të ndjekë me shumë vëmendje zbatimin e dispozitave të reja ligjore për zonat e mbrojtura, sipas kuadrit ligjor të BE-së për mbrojtjen e mjedisit dhe angazhimet ndërkombëtare të Shqipërisë.
Pas deklaratës së delegacionit të BE për miratimin e ligjit për zonat e mbrojtura, ka reaguar në rrjetin social “X” edhe Edi Rama.
Kreu i qeverisë shprehet se është në një “mendje me BE”, teksa shton se ndryshimet e sotme e forcojnë bazën e rrugës së vendit tonë ambicioze “për zhvillim të qëndrueshëm në harmoni me bukurinë mahnitëse të Shqipërisë”.
“100% në një mendje me Bashkimin Europian! Me vizionin #Shqipëria2030 dhe vullnetin e palëkundur për ta bërë këtë vend një destinacion turistik të nivelit më të lartë mesdhetar, ne kemi bërë në 10 vitet e fundit një përparim shembullor në mbrojtje të biodiversitetit. Ndryshimet e sotme e forcojnë bazën e rrugës sonë ambicioze për zhvillim të qëndrueshëm në harmoni me bukurinë mahnitëse të Shqipërisë”, shkruan Rama.
Por organizatat mjedisore e kanë quajtur të pavlefshëm konsultimin publik që është bërë në Komisione me to, duke thënë se konsultimi nuk u bë me një draftligj final.
Sipas tyre, diskutimet pa një draft të plotë dhe final ishte një thyerje e rregullave të konsultimit publik.
“Nëse drafti final nuk do të konsultohet me ekspertët dhe aktivistët është shkelur çdo rregull i konsultim publik,” tha para disa ditësh Olsi Nika ekspert mjedisi.
Kujtojmë se drafti i plotë për ligjin e zonave të mbrojtura doli një ditë para se të miratohej në Kuvend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
