.png)
Nga Gazeta ‘SI’ – Përfaqësues të qeverisë zhvilluan sot një takim me kompanitë e tregut të karburanteve në vend, për të diskutuar monitorimin e çmimeve të naftës, benzinës dhe gazit.
Ministrja e Ekonomisë, Delina Ibrahimaj, njoftoi gjatë takimit se do të ngrihet një mekanizëm i përditshëm monitorimi të çmimeve të hidrokarbureve në tregun vendas, do të ketë analiza periodike për çmimet e bursës dhe tregut vendas, si dhe do të ketë komunikim me kompanitë dhe shoqatën për të siguruar stabilitet në treg.
Nga ana tjetër, ministri i Financave, Petrit Malaj, tha se do të ngrihet një task-forcë e përbashkët mes administratës tatimore dhe doganore, e cila do të ketë për detyrë rritjen e kontrollit dhe efikasitetit tatimor dhe doganor në sektorin e hidrokarbureve, në tregtimin me shumicë dhe me pakicë, monitorimin e marzheve të fitimit në gjithë zinxhirin e tregtimit të hidrokarbureve, nga momenti i importit deri te shitja me pakicë, për të garantuar që çdo ndryshim çmimi të reflektojë zhvillimet reale të tregut.
Gjatë takimit u theksua se situata aktuale në tregjet ndërkombëtare kërkon vëmendje dhe reagim të shpejtë institucional, në mënyrë që të ruhet stabiliteti i tregut dhe të mbrohen interesat e konsumatorëve shqiptarë.
Autoritetet shtetërore do të vijojnë monitorimin e përditshëm të bursave ndërkombëtare dhe të tregut vendas, duke marrë masat e nevojshme në rast të devijimeve të pajustifikuara të çmimeve.
Institucionet mbeten të angazhuara për garantimin e transparencës, konkurrencës së ndershme dhe mbrojtjen e interesit të konsumatorëve në tregun e hidrokarbureve në Shqipëri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje