.png)
Nga Gazeta ‘SI’ – Qeveria synon të transformojë dhe të rikthejë në punë ish-kombinatin Metalurgjik të Elbasanit, duke e vënë në dispozicion të subjekteve private të interesuara.
Me anë të një vendimi, qeveria ngarkon Koroporatën e Investimeve Shqiptare për të identifikuar dhe konsoliduar planin e zhvillimit të kësaj zone me potencial të lartë industriale.
Korporata e Investimeve Shqiptare, do të ndërmarrë të gjithë masat për konsolidimin e pronës shtetërore, duke përfshirë bashkëpunimin me Agjencinë Shtetërore të Kadastrës, shoqëritë shtetërore dhe subjektet private për sqarimin e statusit juridik të pronave.
Paralelisht, do të hartohet një plan i detajuar qendror zhvillimi dhe një projekt konkret për zhvillimin e zonës, në bashkëpunim me institucionet përgjegjëse për planifikimin dhe zhvillimin e territorit.
Afatet për përgjigjet nga institucionet përkatëse janë përcaktuar me 5 ditë nga marrja e kërkesës zyrtare nga KISH, ndërkohë që Ministria e Ekonomisë do të monitorojë dhe vlerësojë ecurinë e përmbushjes së detyrave.
Në një tjetër vendim, qeveria autorizon KISH si zhvillues të pronës së pallatit të sportit “Asllan Rusi”, me qëllim rijetësimin e kësaj godine dhe funksionit të saj.
Korporata, do të ndjekë të njëjtat procedura si edhe me ish-stadiumin Dinamo, ish-ATSH etj, në kuadër të nismës së qeverisë për të kthyer tokat shtetërore në biznese fitimprurëse. Kjo skemë investimi përfshin ortakëri shtet-privat, ku shteti ofron tokën dhe privati investimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
