.png)
Agjencia e Blerjeve të Përqendruara ka hapur një tender 33.3 mln lekë për blerjen e produkteve ushqimore si rezervë shtetërore.
Në listë përfshihen produkte si makarona, miell, vaj luledielli, fasule, orizi, sheqer dhe kripë.
Hapja e këtij tenderi lidhet me debatet e vazhdueshme mbi mungesën e rezervave shtetërore të produkteve ushqimore dhe hidrokarbureve që mund të ndihmojnë vendin në mes të një krize të tillë.
Mbrëmjen e shkuar, ministrja e Financave, Delina Ibrahimaj tha se tregtarët kanë garantuar furnizim pa probleme në periudhë afatmesme të ushqimeve, me ndihmën e shtetit.
Paralelisht, zyrtarët e qeverisë kanë deklaruar se nuk do të bëjnë publike gjendjen e Rezervave Materiale të Shtetit, duke e konsideruar këtë informacion si sekret shtetëror ndonëse kanë pranuar se shteti disponon rezerva të mjaftueshme.
Rezervat materiale të shtetit krijohen për të ndërhyrë, në mënyrë operative, për mbrojtjen e popullsisë, të ekonomisë dhe mbrojtjen e vendit, në situata të gjendjes së jashtëzakonshme, gjendjes së emergjencës civile, veprimeve terroriste, veprimeve ushtarake ( në gjendje lufte), të cilat sjellin dëme të menjëhershme e të rënda për jetën, për shëndetin e popullatës dhe të gjësë së gjallë, për pasurinë, për trashëgiminë kulturore dhe për mjedisin.
Kompanitë që do të marrin pjesë në tenderin e hapur nga Agjencia e Blerjeve të Përqendruara kanë afat deri në datën 1 prill për të dorëzuar ofertat e tyre, ndërkohë që procedura është e hapur dhe vlera e vendosur është pa TVSH.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
