.png)
Nga Gazeta ‘SI’ – Të gjithë konsumatorët e mëdhenj të energjisë në vend do të jenë në një listë ku tregojnë burimet dhe kostot e tyre për sasinë e energjisë që shpenzojnë. Kjo është detyra e re e Agjencisë për Eficiencën e Energjisë.
Në udhëzimin e publikuar në Fletoren Zyrtare, nga ministria e Energjisë, ky ent do të identifikojë bizneset dhe institucionet që konsumojnë deri në 1 mln kWh në vit.
Kështu, AEE do t’i kërkojë informacione OSHEE-së dhe OST-së për klientët që kanë konsum mbi 0.5 milionë kWh, brenda 31 janarit, duke përditësuar listën e konsumatorëve të mëdhenj.
Më pas, ata që futen në këtë listë dhe konsumojnë 0.5-1 mln kilovatorë në vit, të paraqesin të dhëna lidhur me konsumin e burimeve të tjera të energjisë, brenda muajit shkurt. AEE mund të kërkojë detaje nga subjektet për konsumin e energjisë sipas fushës së operimit, p.sh në hotele sa shtretër ka, sa netëqëndrime etj.
Udhëzimi i ri duket të jetë i lidhur me nismat e qeverisë për të ulur konsumin e energjisë dhe për ta bërë atë sa më eficiente, duke arritur një objektiv të caktuar. Një vit më parë, qeveria i vendosi detyrim institucioneve publike të ulin konsumin e energjisë me 15% në raport vjetor.
Më herët gjatë vitit, disa muaj pasi u fshi ideja e fashës energjetike, kryeministri Edi Rama e përmendi përsëri atë.
“Ajo që paguajnë familjet nuk është vlera reale e faturës. Në verë, kur të rritet shpenzimi sërish, do të duhet të rihapim diskutimin e fashës. Por, sot vazhdojmë të paguajmë dhe është një sasi e madhe parash. Nëse këtu do të kishim të bënim me një ekonomi lënguese, nuk do të kishte rritje pagash”, tha Rama më 25 maj 2023.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
