.png)
Gazeta Si – Në Turqi, mbi një mijë persona janë arrestuar në protestat masive që po zhvillohen prej gjashtë ditësh kundër arrestimit të kryebashkiakut të Stambollit, Ekrem Imamoglu, kundërshtari kryesor dhe më efektiv i presidentit Rexhep Tajip Erdogan.
Të hënën në mbrëmje, dhjetëra mijëra u mblodhën pavarësisht ndalimeve të qeverisë: pati më pak përleshje me policinë sesa të dielën, por ndryshimi kryesor ishte mënyra se si Erdogan foli për këtë.
Ai mbajti një fjalim me tone shumë të ashpra, të cilat sugjerojnë se do të vazhdojë t’i bëjë ballë opozitës. Erdogan pretendoi se Partia Popullore Republikane (CHP) e qendrës së majtë dhe nacionaliste të Imamoglut nxiti protestat, duke i shndërruar ato në një “lëvizje dhune”.
Këto janë fjalë të rënda, duke qenë se protestat pothuajse në të gjitha rastet kanë qenë paqësore dhe përplasjet kanë ndodhur mbi të gjitha kur policia ka tentuar t’i shpërndajë.
Erdogan më pas fajësoi CHP-në, duke premtuar pasoja politike dhe gjyqësore për partinë kryesore opozitare.
Ministri i Brendshëm, Ali Yerlikaya, ka përdorur fjalë edhe më agresive, duke akuzuar protestuesit se “terrorizojnë” popullsinë dhe janë kërcënim për sigurinë kombëtare.
Ashtu si ditët e fundit, policia përdori topa uji dhe gaz lotsjellës kundër demonstruesve në Stamboll, në kryeqytetin Ankara dhe në Izmir: tre qytetet ku u zhvilluan edhe të hënën disa nga demonstratat më të ndjekura.
Të paktën 71 persona të tjerë u arrestuan të hënën: gjithsej 1,133 që nga fillimi i protestave.
Mes tyre janë të paktën 8 gazetarë dhe fotografë. Sindikata Disk-Basin-Is, e cila po i dokumenton këto arrestime në rrjetet sociale, akuzoi qeverinë se kërkon të pengojë mediat të mbulojnë protestat, të cilat janë më të mëdhatë që nga ato të vitit 2013, më të rëndësishme në historinë e fundit turke, sërish kundër Erdoganit.
Gjatë një tubimi jashtë Bashkisë së Stambollit, sekretari i CHP-së, Özgür Özel, i cili është një nga udhëheqësit më të dukshëm të protestave, u bëri thirrje mbështetësve të opozitës që të bojkotojnë mediat dhe kanalet televizive pranë qeverisë.
Për më tepër, Özel bëri thirrje që transmetuesi publik TRT të transmetojë drejtpërdrejt gjyqin e Imamoglu, në mënyrë që ai të mund t’i përgjigjet publikisht akuzave të motivuara politikisht kundër tij.
Menjëherë pas tubimit të Özelit, policia hodhi gaz lotsjellës dhe plumba gome për të shpërndarë demonstruesit.
Opozita kërkon që Imamoglu të lirohet nga burgu në pritje të gjyqit si 44 nga personat e arrestuar të mërkurën e kaluar: 47 persona të tjerë, përfshirë dy kryebashkiakë të qarkut të Stambollit, janë ende në burg, si ai.
Imamoglu mori nominimin si kandidat i CHP-së për zgjedhjet presidenciale të 2028-ës në zgjedhjet paraprake të së dielës, por tani si karriera e tij politike, ashtu edhe shanset e opozitës për të mposhtur Erdoganin, janë në rrezik.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
