Projektligji për auditimin teknik të banesave mbi 50-vjeçare, Ministria: Nuk do të thotë shembje, por vlerësim për standardet e ndërtesës

Nga Gazeta ‘SI’ – Ministria e Infrastukturës dhe Energjitikës, MIE, ka sqaruar se projektligji për auditimin teknik të godinave mbi 50-vjeçare në vendim nuk do të thotë se ato do të shemben patjetër.

Ministria e Infrastukturës dhe Energjitikës ka sqaruar sot projekt-vendimin e qeverisë për inspektimin e gjendjes teknike të godinave mbi 50-vjeçare. Në një deklaratë për media, zv.ministrja e MIE, Enkelejda Muçaj dhe Drejtori i Institutit të Ndërtimit, Artan Shkreli kanë treguar se projektligji që ka për qëllim të auditojë godinat për të parandaluar kështu ndonjë fatkeqësi të mundshme, nuk ka të bëjë direkt me shembjen e tyre. Godinat e viteve 50’-60’ do të inspektohen, më pas do të vlerësohet nëse do të kenë nevojë për ndërhyrje, shembje apo mund të rezultojë edhe të jenë brenda standardeve.

“Ky projekt-vendim nuk ka të bëjë me shembje banesash, por ka qëllim të rregullojë procedurat ligjore për një auditim të gjendjes së tyre fizike dhe të qëndrueshmërisë së këtyre objekteve, duke hedhur poshtë kësisoj të gjithë gënjeshtrat dhe dezinformimet që janë dhënë sot lidhur me këtë proces. Të dashur qytetarë bëhet fjalë për një proces tërësisht ligjor, të nisur pas tërmetit në 2019. Dëshirojmë të sqarojmë publikun e gjerë se projektvendimi është ende në fazë diskutimi”, -tha zv.ministrja Enkelejda Muçaj.

Shkreli tregoi se në fakt ky nuk është proces i ri, por ka nisur para dy vitesh, ku në Kuvend, është miratuar një amendim i ligjit për disiplinimin e kontrollin e punimeve, dhe ndërtimit.

“Të gjitha objektet që kanë një moshë mbi gjysmë shekullore, duhet t’i nënshtrohen një auditi teknik, që do të nxjerrë në pah çfarë patologjish kanë, dhe nëse nxjerrin në pah patologji të rënda, këto objekte shteti ka për qëllim të ndërhyjë dhe t’i sjellë në norma. U tha që me mbarimin e procesit të rindërtimit, do të fillonte procesi auditit të këtyre godinave, në mënyrë që largqoftë një projekt tjetër me përmasa të mëdha, të minimizojë sa më shumë dëmet. Ky nuk është një proces i cili ka për qëllim shembjen e objekteve, ky është një proces si një njeri që pasi kalon moshën 50-55 vjeç shkon e bën check in, e njëjta gjë bëhet edhe me godinat, mund të ketë edhe godina që janë në gjendje të mirë. Flitet për godina të bëra në vitet 50-60’”, – tha kreu i Institutit të Ndërtimit Artan Shkreli.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.