Kreu i deputetëve të LSI-së, Petrit Vasili, i ka kërkuar Prokurorisë që t’iu bllokojë pasaportat kryeministrit Edi Rama, ministrit të Infrastrukturës Damian Gjiknuri, dhe kreut të ARRSH-së, Afrim Qendros pas nisjes së hetimeve nga ana e Prokurorisë për një abuzim të mundshëm me tenderin nga ana e qeverisë në projektin e “Unazës së Re”.
Vasili shkruan se Prokuroria është njësh me hajdutët e qeverisë dhe pyet nuk i bllokon pasaportat Ramës, Gjiknurit dhe Qendros.
“E padëgjuar!!! Pas fakteve të tmerrshme për falsifikim dokumentesh, hajdutët e qeverisë pranojnë që kanë vjedhur hapur në mes të sheshit tenderin te Unaza e re dhe e pezullojnë tenderin, – shkruan Vasili në “Facebook”. – Prokuroria më e inkriminuar në botë, në vend të çonte menjëherë pas hekurave hajdutët e qeverisë, heshti për një kohë të gjatë dhe u krijoi kohën, hapësirën, mundësitë që të fshehin provat. Pse nuk i bllokon pasaportat prokuroria Edi Ramës, Damian Gjiknurit dhe Afrim Qendros? Apo pret që të ikin si Gruevski?”.
Sipas Vasilit, kjo prokurori ka vdekur dhe ka zgjedhur të jetë me kusarët e qeverisë dhe kundër ligjit dhe popullit të vet.
“Kjo prokurori ka zgjedhur ta mbështesë dhe ta fshehë krimin dhe jo ta luftojë atë. Kjo prokurori ka zgjedhur edhe fatin e vet të pashmangshëm, që është si i ai krimineleve dhe shkelësve të ligjit, pra dënimi i rreptë dhe pa asnjë tolerim”, – deklaron deputeti i LSI-së.
Gjatë ditës së sotme, Prokuroria e Tiranës njoftoi nisjen e hetimeve lidhur me tenderin për “Unazën e Re”.
Organi i akuzës bëri me dije se po heton mbi faktet e bëra publike për ndërtimet e planifikuara në ‘Unazën e Re’
Verifikimi bëhet për veprat penale të ‘Shpërdorimit të detyrës’, ‘Falsifikimi i dokumenteve’, ‘Shkelje e barazisë në tenderë’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
