Policia e Shtetit, 200 mijë euro pajisje nga Gjermania

Ambasada gjermane i dhuroi Policisë së Shtetit mjete e pajisje të sofistikuara me vlerë rreth 200 mijë euro. Këto mjete do të përdoren kryesisht nga Policia Kriminale dhe Task Forca Speciale, e cila është ngritur për të luftuar grupet kriminale në Shqipëri ose jashtë vendit.
Drejtori i Përgjithshëm i Policisë së Shtetit, Ardi Veliu dhe Ambasadorja e Gjermanisë në Tiranë, Suzan Schutz nënshkruan protokollin e dhurimit të tyre, në prani të ministrit të Brendshëm, Sandër Lleshaj. Gjatë takimit të zhvilluar në ambientet e Task Forcës Speciale Qendrore u theksua edhe njëherë bashkëpunimi mjaft i mirë që ekziston mes dy vendeve në fushën e shkëmbimeve policore.
“Kam kënaqësinë që pata mundësinë të pres Ambasadoren e Republikës Federale të Gjermanisë, me të cilën takohem në harkun e pak javëve, për herë të dytë në mjediset e Policisë së Shtetit. Sot jemi te Task Forca Speciale ku sapo nënshkruam një protokoll për marrjen e një ndihme të konsiderueshme, e cila i adresohet Task Forcës “Forca e Ligjit”, pra i adresohet luftës kundër krimit të organizuar. Ndërkohë që para pak javësh, ne patëm mundësinë që të mirëpresim një paketë tjetër të rëndësishme ndihme që i adresohej kufirit.
Me këtë rast falënderoj Ambasadoren, falënderoj Policinë gjermane, Qeverinë gjermane për mbështetjen e vazhdueshme, një mbështetje, e cila i adresohet forcimit të parametrave të luftës kundër krimit të organizuar, i cili është parakusht i rëndësishëm për të përshpejtuar ecjen e Shqipërisë drejt hapjes së negociatave me BE”, u shpreh ministri i Brendshëm, Sandër Lleshaj.
Po ashtu, ambasadorja gjermane u shpreh se ndihma në këto pajisje tregon bashkëpunimin e mirë mes vendeve dhe se në të ardhmen do të konsolidohet edhe më tej.
“Më lejoni dhe mua të shpreh kënaqësinë time, për të theksuar atë çka sapo tha z. ministër. Sot patëm mundësinë për të dhënë një ndihmë në pajisje, me vlerë të përgjithshme prej 200 mijë eurosh, e cila tregon edhe njëherë në mënyrë simbolike, bashkëpunimin mjaft të mirë që ekziston mes dy vendeve tona, e që në të ardhmen do të konsolidohet edhe më tej”, u shpreh ambasadorja gjermane, Schutz.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.