Gazeta Si – Një punonjës policie me origjinë shqiptare në Filadelfhia, SHBA, mbeti i plagosur me armë gjatë përpjekjes për të mbrojtur një koleg të tij në një operacion për kapjen e një personi të armatosur.
Polici me origjinë shqiptare, Ervis Onuzi dhe kolegu i tij ishin të parët që iu përgjigjën një njoftimi për të shtëna me armë zjarri, kur një i dyshuar për plagosjen me armë të dy grave në rrugë, në tentativë për tu larguar, u fut brenda një pallati në kompleksin “Renehan House” në rrugën “Leiper” dhe filloi të qëllonte ndaj policisë.
Ata e ndoqën me vrap të dyshuarin, deri kur ky i fundit u fut me forcë në katin e dytë të një shtëpie. Prej andej ai hapi zjarr ndaj oficerëve të policisë. Gjatë shkëmbimit të zjarrit, mbeti i plagosur polici Ervis Onuzi 28 vjeç.
Ai mori një plumb në bark, por mediat amerikane raportojnë se aktualisht është në gjendje të stabilizuar në spital.
Autori, një 18-vjeçar i identifikuar si Zyhiem Hartman, qëlloi me armë ndaj 3 civilëve duke i lënë të plagosur, përpara se të futej në një shtëpi dhe prej andej të hapte zjarr ndaj policisë të premten. Pas shkëmbimit të zjarrit me forcat e policisë, raportohet se autori u vetëvra. Edhe gratë e plagosura të moshës 57 dhe 42 vjeçe janë në gjendje të qëndrueshme në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
