Një burim ekskluziv i tha Gazetasi.al, se mes reagimeve që kanë ndodhur gjatë këtyre ditëve ndaj testit antidrogë për policët, është edhe kallëzimi i një efektivi që akuzon laboratorin privat për analiza fiktive dhe për falsifikim.
53-vjeçari me inicialet E.L., kërkon hetime për dëmtim të karrierës së tij, duke kujtuar se ai jo vetëm nuk ka përdorur ndonjëherë lëndë narkotike, por nuk ka pirë ndonjëherë as duhan.
Në kallëzimin e tij, efektivi kujton sipas burimeve shumë të sigurta të Gazetasi.al, se “eprorët e njoftuan për të kryer analizat pranë laboratorit privat dhe ndaj kishte shkuar menjëherë”. “Por më njoftuan se kisha shkelur rregulloren e 2013-ës “Për përdorimin e lëndëve narkotike” në një kohë që kurrë s’kam përdorur drogë”, shprehet polici E.L.
Efektivi 53-vjeçar kërkon hetime me argumentin se i kërkuan që analizat t’i kryente pranë laboratorit në rrugën “Jordan Misja”.
Efektivi nënvizon se menjëherë në të njëjtën ditë kur kreu analizat te ky laborator kishte shkuar dhe tek një laborator tjetër në të cilin ka kryer analizat e drogës. “Të gjitha analizat nga ky laborator dolën negative, kurse të laboratorit të parë dolën pozitive”, akuzon polici që pretendon se analizat e klinikës së denoncuar janë të falsifikuara. “Ky rezultat më ka sjellë shqetësim për jetën time dhe më ka rrezikuar detyrën, ndaj i akuzoj për falsifikim”, thotë polici që, sipas burimeve të Gazetasi.al, nuk është i vetmi që ka kallëzuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
