.png)
Me një kitarë të kuqe në një bar të krijuar në një bodrum në Kiev, sekretari amerikan i shtetit, Antony Blinken, përcolli mesazhin për Ukrainën se SHBA-ja dhe pjesa më e madhe e botës po luftojnë përkrah saj, jo vetëm për Ukrainën, por për botën e lirë.
Blinken, i cili ndërsa po zhvillon një vizitë në Kiev, iu bashkua grupit muzikor në skenën e “Barman Dictat” në kryeqytet. Ata luajtën "Rockin in the Free World" të Neil Young, një himn rock i publikuar në 1989, pak para rënies së Murit të Berlinit.
"Shtetet e Bashkuara janë me ju, aq shumë sa bota është me ju dhe ata po luftojnë jo vetëm për një Ukrainë të lirë, por për botën e lirë. Dhe bota e lirë është gjithashtu me ju", tha Blinken përpara se të luante këngë.
Ai ndoqi si publik pjesën më të madhe të koncertit të bandës muzikore, para se lideri i grupit ta prezantonte atë si një "mik të madh të Ukrainës". Më pas, ai u bashkua me ta në skenë për të luajtur këngën me refrenin "Keep on rockin in the free world".
Kënga u interpretua për herë të parë gjatë një epoke kur Bashkimi Sovjetik po tërhiqej nga protestat në vendet sovjetike. Bashkimi Sovjetik u shpërbë dhe shumë kombe, përfshirë Ukrainën, fituan pavarësinë.
Blinken është zyrtari i parë i lartë amerikan që udhëton në Ukrainë, pasi Kongresi i SHBA-së, muajin e kaluar, miratoi një paketë ndihme ushtarake prej 61 miliardë dollarësh, pas një vonese prej disa muajsh, gjatë së cilës Rusia fitoi përparësi në fushën e betejës.
Blinken mbërriti në Kiev me tren, herët në mëngjes të martën, në një vizitë të paparalajmëruar, e cila vjen disa ditë pasi Rusia nisi një inkursion tokësor në veri të rajonit të Kharkiv.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
