Lëvizja “Për Universitetin” ka publikuar në rrjetet sociale disa dokumente krahasimore ku akuzon ministren e Shëndetësisë, Ogerta Manastirliu për plagjiaturë të temës me të cilën ajo ka mbrojtur doktoraturën e saj.
“Ka gënjyer sepse atë punë, siç tregojnë fotot më poshtë në kapitujt hyrës e ka kopjuar thuajse në çdo gërmë nga puna shkencore e diplomantit për master shkencor nga Republika e Afrikës së Jugut, Fannie Mnisi. Herë pas here në tekst duket se është zëvendësuar emri i lokalitetit Albert Luthuli me emrin e Tiranës, për të dalë në konkluzionet “shkencore” për famëkeqin landfill të Sharrës që i mori jetën minorenit Ardit Gjoklaj”, thuhet në shkrimin shoqërues të postimit.
Postimi ka pesë foto në total, ku krahasohet doktoratura e mbrojtur nga ministrja Manastirliu me titull “Krahasimi i monitorimeve të mjedisit në landfill-in e Sharrës, para dhe pas ndërhyrjes si dhe ndikimet në mjedis” me atë të mbrojtur nga afrikano-jugorja, Fannie Mnisi me titull “Environmental risk assessment associated with unregulated landfills in the Albert Luthuli Municipality, Mpumalanga Province, RSA”.
Para pak kohësh Taulant Muka denoncoi plagjiaturën e ish-zv/Rektorit të Universitetit të Tiranës, ish-anëtarit të Komisionit për Reformën në Arsimin e Lartë dhe Kërkim Shkencor, e tanimë edhe ish-zv/Ministrit të Arsimit në vend, Ervin Demos.
Denoncimi i Mukës pasoi dorëheqjen e Demos. Në vend të tij u emërua pikërisht Taulant Muka, i cili u dorëhoq vetëm pas 2 javëve në këtë detyrë duke akuzuar se puna në “qeveri matej me numrin e like-ve dhe share-ve në rrjetet sociale”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
