.png)
Në sajë të operacionit policor “Kredia”, Policia ka arrestuar shtatë persona, pasi dyshohet se në bashkëpunim me njëri-tjetrin, ata kishin përfituar një shumë prej 3.7 milionë euro nga kreditë fiktive.
Siç njofton policia, grupi i goditur është pjesë e stafit të një fondacioni për dhënie kredie fiktive, që përmes kësaj skeme ata synonin të fitonin miliona euro. Policia bën me dije se në pranga ka përfunduar drejtoresha e fondacionit, sekserët, oficerët dhe ish-oficerët e kredive.
Në pranga kanë përfunduar shtetasit:
A. I., 48 vjeç, banuese në Tiranë, me detyrë Drejtoreshë në një nga degët e filialit të Fondacionit.
B. K., 41 vjeç, banuese në Tiranë, me detyrë Oficere kredie, në një nga degët e filialit të Fondacionit.
M. D., 27 vjeç, banuese në Vorë, Tiranë, me detyrë Oficere kredie, në një nga degët e filialit të Fondacionit.
M. H., 41 vjeç, banues në Tiranë, me detyrën ish-Oficer kredie në një nga degët e filialit të Fondacionit.
E. V., 38 vjeç, banuese në Tiranë, Oficere kredie në një nga degët e filialit të Fondacionit.
O. D., 41 vjeç, banuese në Tiranë, me rolin ndërmjetësuese për gjetjen e personave për kredi fiktive.
A. A., 32 vjeç, banues në Tiranë, me masë sigurie me rolin ndërmjetësues për gjetjen e personave për kredi fiktive, i cili aktualisht është “Arrest në burg”, për një tjetër vepër penale dhe akuza do t’i komunikohet në ambientet e burgut.
Gjithashtu është shpallur në kërkim një shtetas tjetër, pjesëtar i grupit, në rolin e sekserit dhe vijon puna për kapjen e tij.
Nga hetimet e deritanishme ka rezultuar se shtetasja A.I., në pozicionin e drejtoreshës së njërës nga degët e filialit të fondacionit, kishte krijuar ketë skemë mashtrimi dhe në bashkëpunim me personat e tjerë të ndalur kanë lëshuar kredi në mënyre fiktive dhe klientët që kanë përfituar kreditë nuk janë paraqitur fare në zyrat e fondacionit në momentin e aplikimit për kredi.
Ata paraqiteshin vetëm në momentin që disbursohej kredia, bënin tërheqjen e lekëve në banka dhe nga shuma e përfituar e kredisë, këta persona përfitonin 25 deri në 35% të shumës së kredisë dhe pjesa tjetër përfitohej nga Drejtoresha e degës, Oficeret e Kredisë dhe Sekserët që siguronin klientët dhe në përfundim të këtij procesi nga Drejtoresha e degës lëshohej një vërtetim fiktiv, sikur e gjithë shuma e kredituar ishte likuiduar nga klienti.
Shuma e kredive që janë dhënë nga ky staf, deri tani ka shkuar në vlerën 2 000 000 euro dhe në përditësimin e saj shkon në rritje.
Sic njofton policia, nga Drejtoresha e Degës, shtetasja A. I., janë marrë shuma të mëdha valute me interes nga persona të ndryshëm për të mbuluar këtë skemë mashtrimi, të cilat kapin vlerën deri në 1.7 milion euro.
Këta shtetas në bashkëpunim me njëri-tjetrin kanë konsumuar elementet e veprave penale “Skemat mashtruese dhe piramidale”, “Vjedhja duke shpërdoruar detyrën” dhe përfitimet në total deri tani llogariten deri në 3.7 milionë euro.
Ndërkohë vazhdojnë hetimet intensive për evidentimin e përmasave të kësaj skeme mashtrimi dhe përfitimit nëpërmjet këtyre kredive fiktive.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
