Gazeta Si – Ish-kryeministri Sali Berisha ka hyrë për herët të parë në jetën e tij politike në ambientet e Prokurorisë së Posaçme, ku pritet të shpjegohet për akuzat ndaj tij lidhur me procesin e privatizimit të ish-kompleksit sportiv “Partizani”.
Ai ka dalë nga banesa e tij i shoqëruar nga forca policie, por i buzëqeshur, duke thënë një fjali të vetme: “Beteja pa kthim vazhdon!”. Pas mbërritjes në SPAK, ai është pritur me brohorima nga mbështetës dhe deputetë të PD.
Ndërsa Berisha, duke i takuar nga afër deklaroi: “Për të përfaqësuar pluralizmin, PD, jam këtu sot për të denoncuar Edi Ramën dhe grupin kriminal në këtë ndërtesë. Ne do të fitojmë! Fitore!”.
Deputetët mbështetës e pritën Berishën para godinës së SPAK. Flamur Noka, Luçiano Bocci, Albana Vokshi, Edmond Spaho dhe disa të tjerë qëndruan para Prokurorisë së Posaçme derisa makina e ish-kryeministrit mbërriti aty.
Berisha, 79 vjeç, është zyrtari më i lartë i opozitës në tre dekada që përballet me një situatë të tillë ligjore. Ai është në hetim për veprën penale të korrupsionit së bashku me dhëndrin e tij, Jamarbër Malltezi, i cili akuzohet nga SPAK se ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij.
Berisha ndodhet në arrest shtëpiak që prej 30 dhjetorit, edhe pse në kohën kur iu caktua masa e sigurisë “Detyrim paraqitje”, ai nuk e zbatoi asnjëherë duke e cilësuar vendimin e gjykatës si antikushtetues dhe një hakmarrje të kryeministrit Rama, që sipas tij drejton edhe SPAK-un.
Këtë të martë do të jenë prokurorët Enkeleda Minollai dhe Arben Kraja, ata që do i drejtojnë pyetje Berishës, ndërkohë që para nisjes së seancës ka forca të shtuara policie para Strukturës së Posaçme.
Kryedemokrati akuzohet për “korrupsion pasiv” lidhur me aferën, për të cilën u prangos edhe dhëndri i tij Jamarbër Malltezi, nën hetim për pastrim parash.
Kjo është hera e parë që Berisha i përgjigjet thirrjes së SPAK për t’u marrë në pyetje për këtë çështje, pas më herët nuk ka pranuar as të paraqitet siç e përcaktonte ligji në kohën kur ndaj tij ishte caktuar ‘detyrim paraqitje’.
Krahas Berishës, hetimet e drejtësisë së re kanë përfshirë dhe dhëndrin e tij Jamarbër Malltezin, i cili do të merret në pyetje më 25 janar, dy ditë pas vjehrrit.
Malltezi ndodhet me masën e sigurisë “arrest shtëpie” dhe po hetohet për pastrim parash për privatizimin e ish-kompleksit “Partizani”.
Edhe pse për më shumë se 3 javë Berisha nuk lejohet të dalë jashtë shtëpisë së tij, ai e ka gjetur mënyrën si të komunikojë me demokratët.
Nga dritarja e banesës së tij, ai del e mban fjalime prej dy javësh tashmë, çdo pasdite duke u bërë thirrje mbështetësve të dalin në protesta kundër qeverisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
