Megjithëse jetojmë në një botë të ndërlidhur mirë, me akses në shumë dije dhe informacion, që na mbërrin me klikun e një taste, ka diç magjike dhe të rëndësishme tek librat. Aftësia për ta zhytur veten në trillin letrar, leximi i ngeshëm dhe i thellë, është përvojë shpërblyese dhe ndihmon në farkëtimin e aftësive të rëndësishme si të menduarit kritik dhe dhembshuria, dy tipare që po zbehen gjithnjë e më shumë, në shoqërinë tonë.
Organizata jofitimprurëse “Little Free Library” po jep ndihmesën e saj për ta mbajtur gjallë dashurinë ndaj librave, duke frymëzuar leximin, përmes shkëmbimit të librave në lagje të ndryshme të botës, me qëllim ndërtimin e një komuniteti njerëzish që e dashurojnë leximin. Këto biblioteka të vogla po mbijnë kudo, me thuajse 75 mijë të tilla në 88 shtete.
Më e bukura deri tani, është ndërtuar nga një familje në Coeur d’Alene, në shtetin e Idahos, ShBA. Sharalee Armitage Howard, bibliotekare, artiste dhe ngrënëse librash, vendosi të shndërrojë një trung të madh të një peme pambuku, në një bibliotekë të vogël. Ndriçimi i jashtëm i jep pamjen e një përralle të vërtetë, një nga më të bukurat që mund të keni parë!
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
