.png)
Sindikata e pedagogëve ka deklaruar ditën e sotme se do të vijojnë me bojkotin dhe nëse deri ditën e mërkurë nuk ka një përgjigje nga qeveria, në orën 16:00 do të mblidhen para Universitetit Politeknik për të filluar një grevë urie.
“Kushdo që dëshiron të bëhet pjesë e grevës së urisë mund të regjistrohet deri ditën e nesërme pasdite dhe të mërkurën nisim një grevë urie pa afat”, tha Sandër Kovaçi, kryetari i sindikatës.
Ai tha se pasi pritën 3 vite për të marrë një përgjigje të kërkesave të tyre dhe pas një bojkoti 2 javor, tani ka ardhur koha për të përshkallëzuar bojkotin por përsëri duke i lënë qeverisë një shans të fundit për të reaguar.
“Kemi marrë prej ditësh propozimin për të hyrë në një grevë urie por gjithmonë e kemi parë si një mundësi që nuk duhet ta përdorim duke qenë se e shikonim si veprimin e fundit që mund të merrnim por në këto kushte, nuk kemi çfarë të presim më shumë. Të gjithë të mërkurën të jemi këtu në orën 16:00 për solidarizim ndaj të gjithë atyre që kanë marrë përsipër këtë akt sakrifice”, ka mbyllur Kovaçi fjalën e tij duke falenderuar paraprakisht këdo që do i bashkohet grevës së urisë për të shpëtuar arsimin në Shqipëri siç tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
