Pas një serie debatesh e polemikash publike, Akademia “KULT” shpalli fituesit e edicionit të 16 të Çmimeve “KULT”, çmimet kombëtare vjetore që përfshijnë gjithë gamën e artit dhe kulturës shqiptare.
Ndryshe nga vitet e tjera, ka munguar Mbrëmja Gala me tapetin e kuq e të ftuarit specialë për shkak të Covid-19.
Por ndonëse në kohë të pazakonta, pas shpalljes së nominimeve, juria e përbërë nga 184 anëtarë, përmes një platforme online ka bërë përzgjedhjen e saj mes qindra shfaqjeve, botimeve, ekspozitave, koncerteve e festivaleve të sjella përgjatë gjithë vitit 2019 duke vlerësuar artistët më të mirë në secilën kategori:
Artisti Pamor i Vitit, Libri Artistik i Vitit, Libri Studimor i Vitit, Përkthimi i Vitit, Regjisori i Vitit, Aktorja e Vitit, Aktori i Vitit, Balerini i Vitit, Instrumentisti i Vitit, Interpretuesi Lirik i Vitit dhe Kënga e Vitit.
Këto çmime që jepen nga Akademia KULT promovojnë prurjet kulturore dhe artistike më të arrira të vitit që prej vitit 2005.
Ja cilat janë fituesit e Çmimeve “KULT” 2020:
KENGA E VITIT
MARSELA ÇIBUKAJ – “THËRRIME DASHURIE”
INTERPRETUESI LIRIK I VITIT
IVANA HOXHA – AZUCENA tek opera “TROVATORE”
BALERINI/A I/E VITIT
LORI BALA dhe ROVENA SHQEVI – BALETI “ANNUNCIATION” NGA ANGJELIN PRELJOCAJ
INSTRUMENTISTI I VITIT
KLAJDI SAHATÇI – VIOLINË, MENDELSON & BRAMS, KONCERT ME ORKESTRËN SIMFONIKE TË RTSH
AKTORJA E VITIT
EMA ANDREA – LJUBOV ANDREJEVNA tek “KOPSHTI I QERSHIVE”
AKTORI I VITIT
INDRIT ÇOBANI – BELIZE’ tek “ENGJËJT E AMERIKËS”
REGJIA E VITIT
ARBEN KUMBARO – “ENGJËJT E AMERIKËS”
LIBRI ARTISTIK I VITIT
TOM KUKA – me romanin “ORA E LIGË”
LIBRI STUDIMOR I VITIT
ARTAN FUGA – “SHOQËRIA PIRAMIDALE”
PËRKTHIMI I VITIT
MIRA MEKSI – “100 VJET VETMI” të MIGUEL GARCIA MARKEZ
ARTISTI PAMOR I VITIT
GAZMEND LEKA – PIKTURË, EKSPOZITA “DHOMA E HAPAVE TË HUMBUR”
Për ndarjen e çmimeve Kult nuk munguan as polemikat.
Teatri i Shkodrës “Migjeni” dhe Teatri Kombëtar në Tiranë dolën kundër çmimeve “Kult”, duke u shprehur se për shkak të mënyrës si operon Akademia, mënyrës si jepen çmimet dhe jurive që nuk ndjekin shfaqjet, këta dy teatro refuzuan të bashkëpunojnë dhe nuk pranuan që prodhimet e tyre artistike të përdoren.
I pari ishte Teatri “Migjeni” që përmes drejtoreshës Rita Gjeka kërkoi të mos bëhej pjesë e “Kult”, me pretendimin se shfaqja e zgjedhur për të qenë pjesë e konkursit vjetor nuk është ndjekur nga juria përzgjedhëse.
Ndërsa Teatri Kombëtar është shprehur se “nuk e ka njohur asnjëherë ‘Akademinë Kult’ si një organ kompetent për dhënien e çmimeve. Të njëjtën gjë ka deklaruar edhe teatri ‘Migjeni’, një tjetër institucion publik i rëndësishëm i artit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
