.png)
Pas Sali Berishës, edhe Taulant Balla deklaron se Lulzim Basha është i dyshuar nga autoritetet belge për çështjen “Toyota Yaris”.
"Kemi qenë në këtë korridor 4 vite më parë kur Basha lëshoi një akuzë për të cilën ai u dënua penalisht nga gjykata për një akuzë të pavërtetë. Sot jemi në kushtet që pothuajse e gjithë kjo histori është zbardhur dhe ai që më akuzoi sot mua është sot në listën e të dyshuarve. Se për çfarë dyshohet pyesni vetë Lulzim Bashën, ose pyesni institucionet shqiptare dhe ato belge”, u tha Balla gazetarëve.
Sipas Ballës, me apo pa dijeni Lulzim Basha dëmtoi një operacion policor që mund të kishte çuar në arrestimin e shumë personazheve me deklaratën e bërë në 2018-n, kur dy ditë para se të kapeshin 3.4 mln euro në makinën “Toyota Auris” në Portin e Durrësit e paralajmëroi nga salla e Kuvendit.
Balla u shpreh se Basha po ‘korr atë që mbolli’, ndërsa në deklaratën e gjatë iu shmang pyetjeve të gazetarëve mbi incineratorët, duke i kujtuar SPAK se ai personalisht është investuar në dy padi, atë të privatizimit të OSSH nga CEZ dhe padinë për privatizimin e kompleksit “Partizani”, dy dosje për të cilat socialistët akuzojnë Berishën dhe familjarët e tij për përfshirje në afera korruptive.
Bashës, kreu i grupit parlamentar socialist i kujtoi çështjen e lobimit në SHBA, që tha se është ende nën hetim, duke e sjellë si shembull se përse duhet të ndryshojë legjislacioni për financimin e partive politike për të shmangur pastrimin e parave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
