Ambasada Amerikane ka paralajmëruar shtetasit amerikanë rezidentë në Shqipëri, që të shmangin zonat ku do të zhvillohet protesta e opozitës mbrëmjen e së shtunës.
Njoftimi standard që lëshohet 24 orë para protestës së Partisë Demokratike dhe aleatëve të saj u shpërnda përmes faqes së internetit të përfaqësisë diplomatike amerikane në Tiranë.
“Një protestë pritet pranë Kryeministrisë, duke nisur nga ora 19:00. Protestuesit mund të lëvizin në zona të tjera të Tiranës dhe kohëzgjatja e protestës nuk dihet”, thuhet në njoftim.
Si paralajmërim, Ambasada kujton se protestat e fundit të opozitës kanë patur dhunë. “Forcat e sigurisë kanë përdorur ujin dhe gaz lotsjellës për të shpërndarë turmat”, vijon njoftimi.
Ambasada sqaron se personeli i saj dhe familjarët e tyre do të shmangin lëvizjet në zonën ku nis tubimi, por edhe pikat ku parashikohet që të lëvizin protestuesit.
“Shmangni zonat ku grumbullimi i protestuesve është i pashmangshëm”, këshillon ambasada.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
