.png)
Gazeta Si – Ndërsa SPAK ka nisur hetimet, publikohen pamjet e sherrit, kur deputeti demokrat, Xhelal Mziu dhe nipi i tij, dyshohet se kanë goditur me grushte punonjësin e Bashkisë Bulqizë Kalosh Murra në ambientet e jashtme të njësisë administrative Ostren.
Siç shihet edhe në pamjet e marra nga një kamerë sigurie, një person qëndron në ambientet e jashtme, duke folur në telefon dhe më pas afrohet një person tjetër.
Pas një konflikti verbal, personi që po fliste në telefon u godit dhe më pas janë përfshirë edhe persona të tjerë, të cilët godasin punonjësin e Bashkisë së Bulqizës. Ndërsa disa persona të tjerë dalin nga lokali dhe tentojnë të parandalojnë konfliktin.
Në lidhje me këtë sherr, policia njoftoi sot se kishte nisur procedimin penal ndaj drejtuesit politik të PD-së në Dibër, Xhelal Mziu dhe nipit të tij, Elvis Mziu për veprën penale “Kanosja apo dhunimi ndaj pjesëmarrësve në zgjedhje”.
Sipas autoriteteve, ata akuzohen se kanë goditur me grushte, 33-vjeçarin Kalosh Murra nga Shupenza, i cili është punonjës i Bashkisë së Bulqizës në sektorin e ndarjes së ndihmës sociale. Sipas njoftimit të policisë, ngjarja ka ndodhur pas një takimi elektoral, ditën e djeshme.
Në një deklaratë publike, Mziu mohoi përfshirjen në ndonjë incident të tillë, duke e cilësuar ngjarjen si një inskenim të organizuar nga përfaqësues të Partisë Socialiste dhe duke akuzuar strukturat shtetërore për intimidim ndaj qytetarëve dhe manipulim të fakteve.
Gjithashtu ndërsa tregon një tjetër version të historisë, ai i bën thirrje SPAK-ut të nisë hetime të menjëhershme dhe të sekuestrojë pamjet filmike të zonës.
Ndërkohë edhe kreu i PD Sali Berisha, i doli në mbrojtje Mziut. Në konferencën për shtyp, Berisha e konsideroi si “kurth” këtë ngjarje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
