Gazeta Si - “Kam thirrur nesër (të hënën) një takim për paktin e emigrantëve me Shqipërinë për të kuptuar se si do të veprohet”.
Kryeministrja Giorgia Meloni iu përgjigj një pyetjeje në fund të samitit Veri-Jug në Saariselka, në Finlandë. "Më duket se Gjykata e Lartë ka vendosur në favor të qeverisë, është e drejta e qeverive të përcaktojnë se cilat vende janë të sigurta", ndërsa gjyqtarët mund "të hyjnë në çështjen individuale, jo ta rrëzojnë plotësisht atë".
Lidhur me qendrat në Shqipëri, “kishim probleme me interpretimin e rregullave të reja, por po i kapërcejmë”, vazhdoi kryeministrja, “duhet të mendojmë jashtë kutisë: Italia ishte e para që bëri marrëveshje me një vend jashtë BE-së. Kemi disa probleme me interpretimin e rregullave, por po i kapërcejmë. Mendoj se është një mënyrë e re për t'iu qasur këtij problemi”.
Për Melonin: “Fakti që këto kombe (Italia, Greqia, Suedia dhe Finlanda) janë këtu së bashku për të folur se si të trajtohen çështjet kryesore, tregon se ne kemi kuptuar se bota ka ndryshuar dhe tani mund të përballemi me sfidat. Kjo nismë është shumë e vlefshme dhe duhet ta përsërisim edhe në të ardhmen. Ka disa sfida për BE-në, por dy në veçanti. Njëra është siguria e qytetarëve dhe mbrojtja”.
“Ne duam të mbrojmë kufijtë e jashtëm dhe nuk do të lejojmë Rusinë apo organizatat kriminale të minojnë sigurinë tonë”.
Për Rusinë “duhet të kuptojmë se kërcënimi është shumë më i madh nga sa imagjinojmë, ka të bëjë me demokracinë tonë, shfrytëzimin e emigracionit apo atë që po ndodh në Afrikë. Ne duhet të garantojmë sigurinë dhe nuk është vetëm kampi i luftës në Ukrainë, ne duhet të jemi të përgatitur”.
Mosmarrëveshja mes qeverisë italiane dhe gjyqësorit vendas nisi më 18 tetor, kur Gjykata e Romës vendosi kthimin e 12 emigrantëve nga Bangladeshi dhe Egjipti në Itali me argumentimin se këto dy vende ishin të pasigurta, ndonëse autoritetet italiane nuk u kishin dhënë atyre azil dhe i dërguan në kampet e Shqipërisë për të vazhduar me procedurat e riatdhesimit.
Menjëherë më pas, qeveria italiane i miratoi një listë të re vendesh të sigurta origjine, e njëjta gjykatë anuloi edhe dërgimin e grupit të dytë në Gjadër më 8 nëntor, duke argumentuar se do të kërkohet mendimi i Gjykatës Europiane për të Drejtat e Njeriut.
Edhe pse Gjykata e Lartë ka dhënë një opinion, kjo çështje kërkon një vendimmarrje në nivel europian, ndërsa unioni pritet të hartojë një listë të njehsuar vendesh të sigurta origjine në fillim të vitit të ardhshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
