.png)
Prindërit në të gjithë botën janë të shqetësuar sepse AI po përdor imazhe të fëmijëve të zhveshur.
Vajza e Miriam Al Adib ishte një nga disa fëmijë nga një fshat spanjoll që ra pre e imazheve të papërshtatshme të krijuara nga Inteligjenca Artificiale.
Ajo thotë se prindërit në mbarë botën pretendojnë se edhe fëmijët e tyre janë shënjestruar.
Një mësues i Uellsit tha se shkollat duhet të luajnë një rol në shpjegimin e rreziqeve të AI për fëmijët.
Fondacioni ‘Internet Watch’ thotë se nuk është për t’u habitur që kjo praktikë është kaq e përhapur dhe shkollat duhet të bëjnë diçka për të shmangur përhapjen më të madhe të kësaj.
Al Adib ishte mes një grupi prindërish që krijuan një grup mbështetës për të prekurit, gjë që ajo tha se bëri që shumë prindër të tjerë ta kontaktonin atë për shqetësimet e tyre.
“Qindra njerëz më kanë shkruar duke thënë ‘sa me fat keni qenë që keni mbështetje sepse e njëjta gjë na ka ndodhur neve, ka ndodhur me vajzën time dhe nuk kam pasur asnjë mbështetje’”, thotë ajo.
Në samitin e parë të sigurisë së AI në Mbretërinë e Bashkuar javën e kaluar, Sekretarja e Brendshme Suella Braverman tha se qeveria do të angazhohet për të mbrojtur vajzat nga një abuzim i tillë.
“Përmbajtja e shfrytëzimit dhe abuzimit seksual të fëmijëve të krijuar nga AI është e paligjshme, pavarësisht nëse përshkruan një fëmijë të vërtetë apo jo. Do u kërkojmë kompanive të ndërmarrin veprime në trajtimin e të gjitha formave të abuzimit seksual të fëmijëve në internet, duke përfshirë kujdesin, transmetimin e drejtpërdrejtë, materialet e abuzimit seksual të fëmijëve dhe imazhet e ndaluara të fëmijëve ose do të përballen me gjoba të mëdha”.
Susie Hargreaves, shefe ekzekutive e Fondacionit Internet Watch, tha se materiali i abuzimit seksual të fëmijëve i krijuar përmes AI duhet të adresohet “urgjentisht”.
Ajo tha se ishte e shqetësuar se mund të kishte një “tsunami” imazhesh të krijuara në të ardhmen.
“Kjo sepse nuk është diçka që do të ndodhë, por po ndodh”, tha ajo.
Në raportin e tetorit të 2023, fondacioni zbuloi se në vetëm një muaj, më shumë se 20,000 imazhe të krijuara nga AI u gjetën në një forum që ndan materiale të abuzimit seksual të fëmijëve.
Komentet përfshinin urime për krijuesit për realizmin e fotografive dhe përdoruesit që thoshin se kishin krijuar imazhe nga fotot që u kishin bërë fëmijëve në një park.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
