.png)
Është sezoni i pikut turistik në Greqi dhe në plazhin e paprekur të Monastirit në majën veriore të ishullit Paros, një rrjesht shezlongësh me çadra të kuqe mbulon rërën.
Me 70 euro për një palë në rreshtin e parë pranë ujërave të kristalta, më pak se gjysma u zunë, pasi grekët dhe turistët që nuk donin të paguanin, u fshehën nga dielli nën pemët aty pranë.
“Në disa raste ata kanë zënë 100 për qind të plazhit,” tha Nicolas Stephanou, 70 vjeç, një banor vendas. “Ne mendojmë se jemi duke u larguar nga ishulli,” shtoi ai, duke shpjeguar se njerëzit do ndihen jo të mirëpritur nëse nuk përdorin shërbimet e bareve të plazhit që zotërojnë shezlongët.
Shumë banorë vendas si z. Stephanou “janë ngopur” me bizneset në breg të detit që nuk u kanë lënë thuajse as një copëz rëre për të vendosur peshqirët e tyre. Javët e fundit, qindra njerëz të të gjitha moshave kanë organizuar demonstrata, duke ecur përgjatë rërës në tre plazhe me pankarta që shkruajnë “Riktheni plazhet tona”, si pjesë e një lëvizjeje të quajtur Save Paros Beaches.
Që nga fillimi i korrikut, protestat janë përhapur në mbarë vendin, duke frymëzuar një “lëvizje peshqirësh plazhi” të organizuar në mediat sociale nga Korfuzi në veri deri në Kretë në jug.
Ndërsa plazhet janë publike në Greqi, autoritetet lokale japin me qira pjesë të tyre në bare, restorante dhe hotele. Edhe pse jo më shumë se 50 për qind e një plazhi supozohet të jetë i zënë, shumë nga bizneset po zgjerohen ilegalisht, duke zënë më shumë hapësirë.
Në Paros, ku popullsia e saj prej 14.000 banorësh është dhjetëfishuar gjatë verës, këto biznese janë bërë grabitqare, thonë banorët, duke ngarkuar deri në 120 euro, ose rreth 130 dollarë, për shezlongët “V.I.P”.
Edhe turistët nuk janë shumë të lumtur për përhapjen e tyre.
Në plazhin Kolymbithres të ishullit, 10 rreshta shezlongësh zinin kohët e fundit një liman me rërë.
Vasileios Paraskevas, një punëtor 47-vjeçar i fabrikës së makinave nga Gjermania, tha se ai dhe gruaja e tij nuk mund të gjenin vend për çadrën e tyre.
“Nuk mund të shkonim majtas, nuk mund të shkonim djathtas”, tha zoti Paraskevas, i cili përfundoi duke u futur nën hijen e një peme.
“Nuk kishte vend për ne.”
Në të njëjtin plazh, tre motra nga Australia po bënin banjo dielli me peshqirë në një cep.
“Ne do të merrnim një shezlong, pasi nuk mund të gjenim një rrip të lirë rëre për t’u ulur, por ata donin 70 euro,” tha Sue Slieman, një shkencëtare 40-vjeçare që vizitonte motrat e saj, Hoda 42, dhe Laura, 37 vjeç.
“Të gjithë duhet të kenë akses në plazh; nuk duhet të varet nga të ardhurat tuaja”, tha Hoda Slieman.
Si pjesë e luftës së tyre kundër zgjerimit të bizneseve në rërë, anëtarët e grupit Save Paros Beaches shkarkuan kontratat e bizneseve nga një regjistër qeveritar në internet dhe hartuan koordinatat e zonave të caktuara për ta mbi fotot ajrore të marra nga dronët.
“Kishte mospërputhje masive,” tha z. Stephanou – 7.186 metra katrorë të dhëna me qira për bizneset vitin e kaluar u zgjeruan përfundimisht në 18.800 metra katrorë. Banorët mblodhën mijëra firma për një peticion për t’i bërë bizneset të respektojnë rregullat.
Me përhapjen e lëvizjes, autoritetet reaguan. Në fund të korrikut, inspektorët zbritën në dy plazhe në Paros dhe shezlongët u hoqën. Më pas, prokurori i Gjykatës së Lartë të Greqisë urdhëroi një hetim për shkeljet në Paros dhe ishullin Serifos.
Nga frika e gjobave, disa biznese hoqën shezlongët, të paktën përkohësisht. Në Naxos, gjithashtu u hoqën – vetëm për t’u rishfaqur sapo inspektorët u larguan. Autoritetet arrestuan më pas tre biznesmenë.
Inspektorët kryen më shumë se 900 kontrolle në plazhet greke midis 21 korrikut dhe 8 gushtit dhe u vendosën gjoba në një të tretën e rasteve, tha Kostis Hatzidakis, ministri i financave i Greqisë. Ai paralajmëroi një rishikim të kuadrit ligjor që rregullon dhënien me koncesion të plazheve bizneseve “për ta bërë atë më modern dhe transparent”.
Sistemi aktual nuk është aspak efikas, pranoi në një intervistë kryebashkiaku i Paros, Markos Kovaios.
“Ne kemi një problem,” tha ai, duke kërkuar rishikimin e një ligji sipas të cilit autoritetet vendore duhet t’i kalojnë ministrisë për miratimin e marrëveshjeve të qirasë me bizneset dhe për inspektimin e shkeljeve. “Ne duhet të jemi në krye.”
Sa i përket lëvizjes së qytetarëve, ai tha se ishte e tepruar, duke theksuar se Parosi ka të paktën 30 plazhe që nuk paguajnë shezlong. Ai sugjeroi se lëvizja mund të jetë e motivuar politikisht pasi zgjedhjet vendore janë caktuar në tetor.
Megjithatë, në një mbledhje të këshillit vendor javën e kaluar, bashkia e Paros miratoi një sërë propozimesh nga lëvizja qytetare që synojnë të garantojnë që bizneset të mos funksionojnë më përtej zonave të caktuara për ta.
“Në një vend ku fitimi është i shfrenuar, grekët po ndërmarrin veprime për të rimarrë hapësirën e tyre publike,” tha Seraphim Seferiades, një profesor i shkencave politike dhe historisë në Universitetin Panteion në Athinë. “Situata në plazhe mund të ketë qenë kashta që i theu shpinën devesë.”
Eleni Andrianopoulou, një zëdhënëse e lëvizjes në Naxos, tha se vendasit do të protestojnë “derisa drejtësia të rivendoset”.
“Ata i largojnë njerëzit, na thonë se po prishni pamjen,” tha zonja Andrianopoulou. “Është jashtëzakonisht shqetësuese. Ju shkoni në plazh për të qetësuar kokën nga telashet, jo për ta mbushur me ankth.”
Disa bare plazhi refuzuan të komentojnë.
Është e qartë, megjithatë, se mbikëqyrja e dobët dhe vonesat burokratike shpesh lejojnë disa biznese të operojnë pa u ndëshkuar. Edhe ato biznese që marrin miratimin për të operuar zakonisht nënshkruajnë kontrata qeveritare në fund të sezonit dhe jo më parë, për shkak të mungesës së stafit, pranoi kryebashkiaku i Paros.
Giorgos Arkoulis, pronarit të restorantit Dixty, i cili funksionon në plazhin Mikri Santa Maria në Paros për 28 vjet, iu mohua licenca për të vendosur shezlong në plazh këtë vit, por gjithsesi e bëri këtë. Ai tha se priste që vendimi “i palogjikshëm” të anulohej. Në vend të kësaj, ai u detyrua të largonte karriget kot, një lëvizje që shkaktoi ankesa nga klientët e tij.
Në të vërtetë, jo të gjithë vizitorët e mbështesin lëvizjen.
“Unë nuk jam dakord me të – ka hapësirë të mjaftueshme për të gjithë,” tha Theofilos Afouxenidis, një kontabilist 45-vjeçar i ulur nën një pemë pranë Bar Marcello Beach në bregun veriperëndimor të Paros. “Kam qenë këtu vitin e kaluar, ulur në një shezlong përballë plazhit. Ishte e mrekullueshme.”
Grigoris Pirpiris, një 29-vjeçar me origjinë nga Paros që jeton në Athinë, tha se ishte i kënaqur që zyrtarët kishin detyruar bizneset të lironin hapësirë në plazhin Marcello, ku ai luante kur ishte fëmijë.
Por ai është i shqetësuar për llojin e zhvillimit të tepruar turistik, që ai tha se ka pushtuar Mykonos pranë.
“Ata duhet të vendosin frenat”, tha ai. “Plazhi është natyrë.”
Burimi: The New York Times/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
