.png)
Nga Gazeta Si – Një gjykatë në Bjellorusi dënoi me 10 vite burg laureatin e çmimit Nobel për Paqe 2022 Ales Bialatsky, një vendim që ka të ngjarë të shkaktojë protesta të forta nga grupet perëndimore të të drejtave të njeriut.
Fituesi i çmimit Nobel për Paqe, Ales Bialiatski do të duhet të vuajë 10 vjet burg për kontrabandë. Nëpërmjet OJQ-së së tij Viasna, ai është angazhuar që nga vitet 1980 për të promovuar demokracinë dhe lirinë në vend.
Kush është Ales Bialiatski, kundërshtari i Lukashenkos
Bjellorusia është konsideruar prej kohësh “diktatura e fundit në Europë”. Që nga shpërbërja e Bashkimit Sovjetik në vitin 1994, vendi ka qenë në duart e Aljaksandr Lukashenko, një aleat i ngushtë i Rusisë dhe në veçanti i Presidentit Putin.
Ndër kundërshtarët kryesorë të presidentit bjellorus është Ales Bialiatski. Gjashtëdhjetë vjeç, aktivist i të drejtave civile që nga vitet ‘80, në vitin 1996 themeloi qendrën studimore Viasna. Qëllimi është gjithmonë të sjellë demokracinë në Bjellorusi.
Në vitin 2011 Bialiatski u ndalua në burg pa një gjykim të rregullt. I liruar në vitin 2014, ai u arrestua sërish në vitin 2021.
Protestat e vitit 2020 dhe Çmimi Nobel për Paqen
Viti i pandemisë ishte gjithashtu një vit shprese për Bjellorusinë. Protestat masive tronditën vendin dhe vunë në rrezik stabilitetin e regjimit të Lukashenkos.
Megjithatë, diktatori vendosi t’i shtypte me dhunë këto protesta dhe pjesë e strategjisë së zbatuar përfshinte edhe arrestimin e disa prej kundërshtarëve më të shquar.
Pikërisht në këtë kontekst Bialiatski burgoset për herë të dytë. Ashtu si i pari, ai nuk merr një proces të rregullt ligjor dhe qëndron pas hekurave për gati tre vjet pa u provuar fajësia. Në vitin 2022 ai u nderua me Çmimin Nobel për Paqe për betejat e tij, së bashku me aktivistë të tjerë bjellorusë, rusë dhe ukrainas.
Gjyqi dhe dënimi i kontrabandës
Më në fund, megjithatë, procesi u zhvillua. Bialiatski dhe dy të bashkëpandehurit, Valentin Stefanovitch dhe Vladimir Labkovitch, u akuzuan për kontrabandë dhe financim të aktiviteteve që cenojnë rëndë rendin publik, një krim për të cilin dënimi varion nga 7 deri në 12 vjet burg në Bjellorusi.
Dënimi ishte 10 vjet për fituesin e çmimit Nobel, 9 dhe 7 vjet për të pandehurit e tjerë. Svetlana Tikhanovskaïa, kundërshtarja kryesore e Lukashenkos në mërgim në Poloni, komentoi dënimin duke e quajtur atë një padrejtësi.
Politikanja tha në Twitter: “Ne duhet të bëjmë gjithçka për të luftuar këtë padrejtësi të turpshme”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
