Një kompani gjermane ka gjetur mënyrën për të hequr mikroplastikën nga uji

Mikroplastika kontaminon të gjithë planetin, nga akulli i Arktikut deri në malin Everest. Grimcat e vogla, më pak se 5 milimetra në diametër, janë në ajrin që thithim dhe janë gjetur në placentën, gjakun dhe mushkëritë e njeriut.

Shkencëtarët vlerësojnë se ka të paktën 14 milionë tonë metrikë mikroplastikë në oqean, dhe ndërsa të gjitha llojet e mbeturinave plastike konsiderohen të këqija për mjedisin, këto janë të vështira për t’u zbuluar dhe hequr për shkak të vogëlsisë së tyre.

Kompania gjermane Wasser 3.0 mund të ketë gjetur përgjigjen për pastrimin e ndotjes mikroplastike duke përdorur një vorbull dhe një xhel silicë hibrid të zhvilluar posaçërisht për këtë çështje.

Procesi përfshin krijimin e një vorbulle në një rezervuar uji. Shtohet një përbërje, e quajtur Wasser 3.0 PE-X, e cila vepron si një agjent grumbullues, duke tërhequr çdo mikroplastikë në formë kokoshkash që ngrihen në sipërfaqe dhe mund të hiqen duke përdorur një sitë.

“Teknologjia e heqjes është shumë e thjeshtë”, thotë Katrin Schuhen, themeluesja e Wasser 3.0, duke shtuar se procesi mund të përdoret në çdo lloj uji, nga uji i ëmbël, ai i detit, tek ai industrial dhe ujërat e zeza.

Xheli hibrid i silicës përbëhet nga kimikate me bazë silikoni të quajtur organosilane dhe nuk është toksik, thotë Schuhen.

Ajo thotë se ajo që mbetet është uji pa plastikë dhe topa të plastikës dhe xhelit të grumbulluar që mund të ripërdoren në disa mënyra, për shembull si mbushës izolues gjatë ndërtimit.

Wasser 3.0 dëshiron që teknologjia të përdoret si një hap i ri në impiantet e trajtimit të ujërave të zeza ose proceset industriale. Me teknologjinë aktuale, mikroplastika nga pasta e dhëmbëve, produktet e kujdesit për lëkurën ose rrobat nuk filtrohen kurrë dhe lëshohen në oqean, liqene dhe lumenj, sipas Programit të Mjedisit të OKB-së.

Gjatë një prove 12-mujore në Gjermani, u hoqën rreth 270 kg mikroplastikë, thotë Schuhen.

Metoda të tjera për heqjen e mikroplastikës ekzistojnë por janë shumë të shtrenjta dhe kërkojnë shumë kohë sipas Schuhen.

Schuhen thotë se Wasser 3.0 është një zgjidhje e përballueshme dhe e thjeshtë për problemin global të ndotjes mikroplastike.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.