Partia Socialiste ka filluar punën për reformën zgjedhore, duke ecur me parimin se për të kaluar ndryshimet voliten vetëm 84 vota dhe jo një konsensus më i gjerë.
Kjo ka bërë që komisioni për reformën të rindezë punën duke pasur si bashkëkryetar Enkelejd Alibeajn si përfaqësues të PD-së zyrtare, dhe bashkë me të edhe numrat për të arritur kuorumin edhe pse grupi Basha është në minorancë numrash në Kuvend.
Një ditë pas letrës që dy bashkëkryetarët i nisën OSBE, Damian Gjiknuri dhe Enkeleid Alibeaj kanë zhvilluar një takim me përfaqësuesit e kësaj zyre.
“Takova sot përfaqësuesit e zyrës së OSBE-së në Shqipëri me të cilët diskutuam mbi procesin e reformës zgjedhore, rifillimin e punës në Komisionin e Posaçëm Parlamentar me synim adresimin në ligjin elektoral të rekomandimeve të OSBE/ODIHR dhe vendimeve të Gjykatës Kushtetuese.
I falenderova për mbështetjen e deritanishme dhe për gatishmërinë për të vazhduar këtë angazhim edhe më tej, përmes ekspertizës më të mirë nga ODIHR, e cila do të ndihmojë komisionin për të arritur zgjidhjet e duhura teknike në funksion të adresimit të plotë të rekomandimeve”, thuhet në njoftimin zyrtare të përcjellë nga Gjiknuri.
Pastaj përfaqësuesit e OSBE takuan edhe Enkelejd Alibeajn. Grupi parlamentar i drejtuar nga Gazment Bardhi prej kohësh ka pamundësuar punime normale në Kuvend me qëllim përfaqësimin si bashkëkryetar në komisionin e reformës. Lëvizjet e fundit Alibeaj-Gjiknuri të konfirmuara një ditë më parë edhe nga Lulzim Basha tregojnë se komisioni për reformën e ka filluar punën, pavarësisht rrëmujës në Kuvend nga e cila po përfitojnë vetëm Basha dhe Rama.
Ambasadorja në detyrë e Prezencës së OSBE-së në Shqipëri, Clarisse Pasztory, pas takimeve të sotme me Damian Gjiknurin dhe Enkelejd Alibeajn për Reformën Zgjedhore, ka bërë një postim në rrjetet sociale. Ajo shkruan se mirëpret nisjen e punës për Reformën Zgjedhore.
Met co-chairs of #electoralreform ad hoc ctte @DGjiknuri & @enkelejdalibeaj today. Welcome that substantive work will resume this Friday &accelerate in coming weeks with help &expertise from @osceinAL & @OSCE/ODIHR.Continuing inclusive mtgs on this important reform in coming days pic.twitter.com/yCONtrLFig
— Clarisse Pasztory (@OSCEambAL) January 16, 2024
“Takova sot bashkëkryetarët e komisionit të Reformës Zgjedhore, Gjiknuri dhe Alibeaj. Mirëpres rifillimin e punës të premten dhe përshpejtimin e saj javët e ardhshme, me ndihmë e ekspertizë nga OSBE-ODIHR. Vijojmë takimet gjithëpërfshirëse për këtë reformë të rëndësishme“, - shkruan Paszstory.
Pas takimit ka reaguar edhe Enkelejd Alibeaj, duke u shprehur se Reforma Zgjedhore është prioritet për Partinë Demokratike.
“Sot pata kënaqësinë të mirëprisja në një takim Ambasadoren në Detyrë të Prezencës së OSBE/ODIHR në Shqipëri, Clarisse Pasztory, së bashku me një delegacion, për të bashkëbiseduar mbi procesin e Reformës Zgjedhore, që mbetet jetik për demokracinë e vendit.
Në cilësinë e bashkë-kryetarit të Komisionit të Posaçëm për Reformën Zgjedhore, i shpreha konsideratën për mbështetjen permanente të Prezencës së OSBE në Shqipëri mbi procesin e Reformës Zgjedhore, në përputhje me frymën e parimeve kushtetuese, vendimeve të Gjykatës Kushtetuese dhe rekomandimeve të OSBE/ODIHR.
Po ashtu, i sigurova se për Partinë Demokratike të Shqipërisë, Reforma Zgjedhore përbën prioritetin kryesor, i cili duhet të jetë gjithëpërfshirës dhe transparent për shqiptarët, në mënyrë që t’u garantohet qytetarëve shqiptarë një proces zgjedhor i lirë dhe i drejtë, nëpërmjet listave të hapura, një zonë kombëtare zgjedhore, votim për qytetarët shqiptarë në diasporë dhe proces votimi dhe numërimi elektronik.
Gjithashtu, e falenderova znj.Pasztory për konsistencën në mbështetjen e vazhdueshme të Prezencës së OSBE në Shqipëri mbi Reformën Zgjedhore dhe për ofrimin e vyer të asistencës teknike në Komisionin e Posaçëm të Reformës Zgjedhore”, - shprehet Alibeajt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.