Gazeta Si - Përveç procedimit penal për shpërdorim detyre dhe korrupsion, ndaj Alqi Bllakos ka nisur edhe një hetim pasuror.
Për ish-deputetin e PS, në paraburgim prej disa javësh, SPAK do të kryejë disa verifikime mbi pasurinë e tij.
Sipas informacioneve paraprake, përveç sekuestrimit të apartamentit në pronësi të babait të ish-deputetit, do të kontrollohen edhe llogaritë e tij bankare.
SPAK po kryen veprime hetimore, ku sipas burimeve, institucioni i akuzës ka kërkuar informacion në bankat e nivelit të dytë për të verifikuar llogaritë bankare që mund të ketë Bllako.
Shkresa për të verifikuar pasuritë e Bllakos janë dërguar edhe në institucionet e agjencitë e pronave, për të parë nëse ka pasuri në emër të ish-deputetit dhe familjarëve të tij.
Alqi Bllako u arrestua me urdhër të SPAK më 1 prill 2022.
Pak ditë më parë, ai depozitoi një ankim në Gjykatën e Apelit, ku kërkon pafajësinë për zbutje të masës së sigurisë, “arrest në burg”.
Sipas dosjes hetimore të SPAK, i mandatuari i PS në zgjedhjet e 25 prillit 2021, akuzohet për procedurën e shpronësimit të tokës arë, ku do të ndërtohej incineratori i Fierit, me sipërfaqe 111 564 m2.
Hetim pasuror është duke u kryer edhe për ish-ministrin e Mjedisit, Lefter Koka.
Ndaj tij rëndojnë dy masa arresti me burg për aferën e inceneratorëve të Fierit dhe Elbasanit.
Po ashtu, Koka akuzohet edhe për pastrim parash. Përveç sekuestrimit të kantinës së pijeve alkoolike dhe katër pronave, po verifikohen edhe llogaritë bankare të tij e familjarëve të tij.
Sipas SPAK për aferën e dy inceneratorëve ai ka përfituar në formën e ryshfetit rreth 4.9 milionë euro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
