Gazeta Si - Ngordhja e një numri të madh shpendësh në tre pulari në Durrës, duket se nuk ka asnjë rrezik për njerëzit.
Në një reagim të radhës, Ministria e Bujqësisë, thotë se nuk bëhet fjalë për një grup shpendësh, por për një tjetër sëmundje, të quajtur “laringotrakeiti infektiv”.
Sipas ministrisë, kjo sëmundje prek rrugët e sipërme të frymëmarrjes dhe se nuk ka asnjë rrezik që të kalojë nga shpendët te njerëzit.
Sa i përket shifrave të shpendëve të ngordhur, ato nuk përputhen mes vetëdeklarimit të pronarëve të pularive një ditë më parë dhe konstatimit të ministrisë këtë të premte.
Kjo e fundit thekson se kanë ngordhur 200.000 pula, ndërkohë që pronarët e pularive këmbëngulin që shifra ka shkuar në rreth 500.000.
“Laringo-trakeiti infektiv nuk është një sëmundje zoonotike dhe nuk transmetohet te njerëzit dhe as nëpërmjet produkteve ushqimore nga shpendët, për pasojë nuk përbën rrezik për shëndetin publik”, - thuhet në njoftimin e Ministrisë së Bujqësisë.
Ministria siguron konsumatorët se deri më tani nuk ka asnjë rast ku të jetë shfaqur influence aviare (gripi i shpendëve), duke shtuar se në subjektet e tjera shpend-rritëse për vezë e mish, në të gjithë territorin e vendit, AKVMB ka marrë masa të menjëhershme për parandalimin e përhapjes së sëmundueshmërisë dhe deri më tani nuk është raportuar asnjë rast.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
