Çdo 31 dhjetor, njerëzit nga e gjithë bota mblidhen për të pritur Vitin e Ri ndërsa lënë pas atë të vjetrin . Festat dhe fishekzjarret janë të zakonshme ndërsa ora numëron deri në mesnatë, por ka edhe shumë mënyra tradicionale të tjera për të pritur Vitin e Ri. Nga ato më të çuditshmet deri te ato më të mrekullueshmet, këtu janë disa tradita unike për Natën e Vitit të Ri.
Hedhja e ujit, Kuba
Kubanët besojnë se hedhja e një kove me ujë të pisët nga shtëpitë e tyre në mesnatë përfaqëson veprën e pastrimit të fatit të keq, fatkeqësive dhe energjive negative që janë grumbulluar gjatë vitit të kaluar. Ky veprim ka për qëllim të niset viti i ri nga e para, i mbushur me energji pozitive dhe shpresë për fat më të mirë përpara. Përgatitja për këtë ritual përfshin pastrimin e shtëpive, me çdo qoshe . Uji që përdoret gjatë pastrimit ruhet dhe hidhet në rrugë në mesnatë, duke shënuar lënien pas të të këqijave.
Të varurit e qepëve, Greqi
Tradita e varjes së qepëve në kulturën greke është thellësisht e rrënjosur në simbolikë dhe ritual. Qepët, të nderuara që nga Greqia e lashtë përfaqësojnë rilindjen, pjellorinë dhe rigjenerimin. Varja e një qepe në derë besohet se promovon rritjen personale dhe begatinë për familjen në vitin që vjen. Ky ritual shpesh kryhet pas shërbimit të kishës në Ditën e Vitit të Ri, kur familjet sjellin një qepë në shtëpi dhe e varin afër hyrjes për të mirëpritur fillimet e reja dhe për të larguar negativitetin.
Shërbimi i 12 frutave rrumbullake , Filipinet
Në Natën e Vitit të Ri, familjet në Filipine sigurohen që të shërbejnë 12 fruta sferike, të cilat besohet se përfaqësojnë begatinë për shkak se janë të rrumbullakëta. Sa i përket numrit të fatit, secili frut përfaqëson një muaj të vitit. Frutat zakonisht zënë vendin kryesor në tryezë gjatë darkës së mesnatës.
108 goditjet e kambanave, Japonia
Në mesnatë të 31 dhjetorit, 108 kambana bien në gjithë Japoninë. Ky veprim quhet Joya-no-Kane dhe kambanat bien nga budistët. Numri i goditjeve përfaqëson atë që njihet në budizëm si “dëshirat tokësore”. Nëse ndodheni në Japoni, mund ta dëgjoni goditjen e kambanave në televizor ose radio.
Goditja e tenxhereve dhe tiganëve, Irlanda
Megjithëse kjo traditë nuk është shumë e popullarizuar në botën moderne, ka pasur një kohë kur ky rit dhëniesh dhuratash uellsian ishte po aq i dashur sa Dita e Krishtlindjeve. Nga agimi deri rreth mesditës së Ditës së Vitit të Ri, fëmijët do të shkonin nga dera në derë në një lojë që ka disa ngjashmëri me “trick or treat”. Duke kënduar ose përsëritur vargje në pragun e derës, ata shpërbleheshin me dhurata si monedha bakri ose ëmbëlsira. Fjala calennig i referohet një molle ose portokalli të mbushur me karafilë dhe fruta të thara. Këto do të mbaheshin nga fëmijët si një simbol i fatit të mirë dhe më vonë do të shfaqeshin në shtëpitë e familjeve të tyre.
Djegia e dëshirave, Armenia
Të gjithë e dimë që duhet të shprehim një dëshirë kur ora arrin në 12-të në Natën e Vitit të Ri, por në disa pjesë të botës, ata nuk thjesht bëjnë një dëshirë, ata e konsumojnë atë. Në një traditë që i përket Rusisë, disa familje shkruajnë dëshirat e tyre për Vitin e Ri në copa letre, të cilat më pas i vendosin në zjarr dhe i hedhin në gotën e pijes. Pastaj, është zakoni që të pihet hiri kur ora godet goditjen e saj të 12-të. Ky zakon është gjithashtu i zakonshëm në Armeni.
Pjekja e mollëve, Çekia
Ndërsa Viti i Ri afrohet, njerëzit në Republikën Çeke tradicionalisht presin një mollë në dy pjesë për të parashikuar se si do të duket viti që vjen. Nëse thlapi është rrethuar nga forma e një ylli, do të keni një vit të mirë dhe me fat. Nëse thlapi ka formën e një kryqi, mund të keni një vit të vështirë dhe të rrezikshëm përpara.
Torta Vasilopita, Qipro
Në Qipro, Viti i Ri pritet me tortë. Në besimin ortodoks grek, 1 janari është dita e shenjtorit Shën Vasili, ose Agios Vasilios, i cili është shenjti i lidhur me Babagjyshin e Vitit të Ri, ndryshe nga Shën Nikolla në traditën perëndimore. Dhe kështu, më 1 janar, shërbehet një tortë e emëruar në nder të tij, “vasilopita”, në një traditë që ndiqet gjithashtu në Greqi, Ballkan dhe disa pjesë të Evropës Lindore. Në ditët e kaluara, torta pritej nga kryefamiljari, në praninë e të dashurve, dhe kishte për qëllim të sillte bekime në shtëpi. E fshehur brenda kësaj ëmbëlsire, e cila përgatitet nga një larmi brumrash, në varësi të traditave të ndryshme familjare, gjendet një monedhë. Kushdo që merr pjesën që përmban këtë objekt të vogël është i parashikuar të ketë fat për pjesën tjetër të vitit.
Kërcimi nga karrigia, Danimarkë
Kur ora godet mesnatën në Danimarkë, është traditë të ngrihesh në një karrige dhe të hidheshe në dysheme. Duke kaluar momentet e fundit të vitit me këmbët larg nga toka, danezët besojnë se mund të hidhen në vitin e ri të freskët, duke lënë pas çdo negativitet dhe energji të keqe nga viti që sapo ka kaluar.
Hogmanay, Skoci
Hogmanay është fjala skoceze për ditën e fundit të vitit. Shumë besojnë se ajo daton që nga shekulli i 8-të, kur Vikingët pushtuan Skocinë. Këta pushtues festonin solsticin e dimrit me festa të mëdha me zjarr. Në Ishujt Shetland të Skocisë, festivali vjetor Up-Helly-Aa vazhdon këtë traditë, por në pjesën tjetër të vendit ka kaluar në Hogmanay. Festimi gjithashtu mori rëndësi kur udhëheqësit fetarë dëbuan Krishtlindjet nga Skocia për shkak të ndarjeve fetare.
Me Krishtlindjet të ndaluara për gati 400 vjet, shumë njerëz e bënë Hogmanay-n festën më të madhe. Kur ora godet mesnatën, njerëzit përshëndeten me ngritje gotash tradicionale si “Lang may yer lum reek”. Ky është një urim në skocez për fat të mirë. Auld Lang Syne, një poezi nga poeti më i famshëm skocez Robert Burns, është bërë tingulli i Vitit të Ri në mbarë botën. Në çdo festë Hogmanay, njerëzit mblidhen në një rreth për të lidhur duar dhe për të kënduar vargjet pas goditjes së orës në 12.
Të ngrënit e 12 kokrrave rrush, Spanjë
Në minutën para mesnatës në Natën e Vitit të Ri, njerëzit në Spanjë tradicionalisht hanë 12 rrushë. Ky zakon besohet se sjell fat dhe begati për vitin që vjen, si dhe largon shpirtrat keqinj . Të ngrënit e rrushëve në Natën e Vitit të Ri është gjithashtu i zakonshëm në Amerikën Latine dhe Indonezi.
Kërcimi mbi valë, Brazil
Nëse shkoni në bregdetin e plazheve të bukura të Brazilit gjatë numërimit përmes orës deri në mesnatë të Natës së Vitit të Ri, do të shihni shumë njerëz që hyjnë në ujë të cekët, duke u përgatitur për të hyrë në Vitin e Ri me zakonin e kërcimit mbi shtatë valë (një për çdo ditë të javës) . Në këtë mënyrë, brazilianët nderojnë Yemoja, perëndeshën e detit, me shpresën për të fituar favorin e saj për vitin që vjen. Gjithashtu është e zakonshme që të sillni dhurata si bizhuteri dhe lule, për t’i lënë në breg.
Mbajtja e një valixheje të zbrazët, Amerika Latine
Në Amerikën Latine, ata që kanë dëshirë për udhëtime e presin Vitin e Ri duke mbajtur një valixhe të zbrazët dhe duke ecur rreth bllokut të tyre. Besohet se ky veprim është mjaftueshëm për të siguruar që viti që vjen do të jetë i mbushur me udhëtime dhe aventura. Njerëzit gjithashtu kanë filluar të garojnë me valixhe të zbrazëta, për të përshpejtuar ndodhitë.
Një puthje në mesnatë, Gjermani
E lindur nga folklori gjerman, është traditë që njerëzit në shumë pjesë të botës perëndimore të ndajnë një puthje në mesnatë. Ky zakon ka ekzistuar që nga shekulli i 4-të dhe besohet se puthja do të sjellë fat të mirë për ju dhe të dashurin tuaj për vitin që vjen.
Burimi: The National. Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
