.png)
Nga Gazeta ‘SI’ – Kuvendi i ka kërkuar Autoritetit të Mbikëqyrjes Financiare t’i kushtojë më shumë vëmendje tregut të sigurimeve dhe ta përmirësojë atë.
Në rezolutën e miratuar, Kuvendi kërkon që brenda këtij viti, AMF të hartojë metodologjinë e aplikimit të faktorëve të riskut në sigurimet e detyrueshme motorike, si historiku i dëmeve, fuqia motorike, mosha e të siguruarit, eksperienca në drejtimin e mjetit motorik, burimi i energjisë së mjetit, distanca vjetore e përshkruar, qarku i regjistrimit të mjetit dhe vjetërsia e mjetit.
AMF duhet të vazhdojë mbikëqyrjen e shoqërive të sigurimit dhe përmbushjen e detyrimeve që ato kanë, përfshirë dëmet pezull dhe kriteret për plotësimin e kapitalit minimal dhe të mbulimit të provigjioneve teknike.
Një tjetër detyrë me rëndësi që Kuvendi i lë Autoritetit është ajo e miratimit të rregullores për kriptomonedhat. Si edhe të vijojë punën kundër pastrimit të parave në kuadër të Moneyval.
Ndër kërkesat e tjera përfshihen, zhvillimi i pensioneve private, teknologjitë e reja, bashkëpunime me institucionet tjera, edukimi financiar dhe forcimi i kapaciteteve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
