E hëna e 11 shtatorit shënon dhe nisjen e vitit të ri shkollor 2023-2024. Teksa regjistrimet kanë vijuar dhe gjatë ditës së diel, këtë vit të ri shkollor duket se numri i nxënësve do të jetë më i vogël se një vit më parë. Ndonëse ministria e Arsimit nuk ka bërë publike akoma numrin total të nxënësve, deri më tani mësohet se ky numër është më i vogël se vitin e kaluar, por pritet që deri në orën 24.00 të ditës së dielë kur mbyllet afati, të kemi dhe shifrën zyrtare.
Ndryshe nga vitet e tjera, për shkak të numrit të ulët të regjistrimeve, Ministria e Arsimit u detyrua të shtyjë dy herë afatin e regjistrimeve në shkollat e arsimit parauniversitar.
Afati i parë ishte nga mesi i gushtit deri në datën 1 shtator.
Më pas u shty deri në datën 4 shtator dhe më pas u caktua e diela pak orë para se të nisë viti i ri shkollor, si afati i fundit.
Sipas informacioneve jo zyrtare, mësohet se deri më tani janë afro 28 mijë nxënës të regjistruar në klasat e dhjeta, shifër që konstatohet të jetë më e ulët se vitin e shkuar.
Por numri i regjistrimeve duket i vogël dhe në regjistrimet e klasave të para.
Kjo rënie vijon prej disa vitesh, referuar statistikave të vitit 2022 ku u ulën në bankat e shkollës rreth 450 mijë nxënës, 30 mijë nxënës më pak se viti paraardhës.
Kjo rënie pritet të jetë e ndjeshme edhe këtë vit, ku ndikim duket se ma patur emigrimi i shqiptarëve drejt vendeve të BE.
Të dhënat e fundit të publikuara nga INSTAT tregojnë një rënie të konsiderueshme të regjistrimeve për vitin shkollor 2022-2023, sipas të cilës, në arsimin zyrtar u regjistruan 554.222 nxënës dhe studentë, me një ulje prej 4,1 %, krahasuar me vitin shkollor 2021-22.
Uljen më të madhe të regjistrimeve e ka pësuar arsimi i mesëm, me 7.4% nxënës me pak të regjistruar në gjimnaze krahasuar me një vit më parë. Ndërsa në shkollat 9-vjeçare, ka një rënie regjistrimesh prej 3.6% nga viti shkollor 2021-2022.
Gjithashtu, viti shkollor 2022-2023 shënoi rënie në regjistrimet në nivelin parashkollor me 3.6% dhe me 2% në arsimin e lartë.
Ministria e Arsimit ka shpërndarë tekste falas për rreth 242 mijë nxënës në të gjithë Shqipërinë.
71 mijë prej tyre janë nxënës nga klasa e parë në të tretën që do t'i përfitojnë tekstet falas me një përdorim, pa pasur detyrimin që t'i kthejnë ato në fund të vitit shkollor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.