Bundestagu gjerman u mblodh këtë të enjte me kryetemë vendimmarrjen për negociatat për Shqipërinë dhe Maqedoninë e Veriut, ku nuk pritet asnjë surprizë dhe të zyrtarizohen qëndrimet e shprehura në rezolutën e CDU/CSU.
Nënkryetarja e këtij grupi parlamentar në Bundestag, Katja Leikert u shpreh e sigurtë për këtë.
“Bundestagu gjerman sot do të pajtohet të fillojë negociatat e pranimit në BE me Shqipërinë dhe Maqedoninë e Veriut. Fraksionet e koalicionit të CDU / CSU dhe SPD janë pajtuar për këtë”, thotë ajo.
Deputetja gjermane foli për DË, ku tha se Gjermania po shpërblen përparimin e bërë deri më tani nga të dy vendet kandidate. “Ka ende një rrugë të gjatë, e cila kërkon durim dhe reforma të mëtejme. Prandaj ne kemi përcaktuar qartë hapat e domosdoshëm që duhen ndjekur në luftën kundër korrupsionit, krimit të organizuar dhe trafikut të drogës”, thotë Leikert.
Nënkryetarja e CDU/CSU kujtoi se reformat nuk bëhen për t’i bërë qejfin Gjermanisë dhe BE-së. Leikert ishte në Tiranë në fund të muajit gusht ku zhvilloi një sërë takimesh, në një vizitë që u interpretua mbledhëse informacioni mbi qëndrimin e palëve për krizën politike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.