Kriminelët po shesin udhërrëfyes në mediat sociale se si të mashtrojnë dhe të shantazhojnë, ka mësuar BBC.
Udhëzuesit u tregojnë njerëzve se si të sillen si gra të reja në internet, të mashtrojnë një viktimë për të dërguar materiale me përmbajtje seksuale dhe më pas t’i shantazhojnë ato.
Të martën, Olamide Shanu u paraqit në gjykatë në Londër. Ai besohet të jetë pjesë e një bande që fitoi më shumë se 2 mln euro nga shantazhi i të rriturve dhe fëmijëve në internet.
Muajin e kaluar Agjencia Kombëtare e Krimit lëshoi një alarm për shkollat në të gjithë Mbretërinë e Bashkuar, duke paralajmëruar kundër rreziqeve të mashtrimeve në internet.
Ekspertët thonë se ka pasur një rritje të madhe të numrit të fëmijëve që bien viktima të dhunës së kryer nga bandat në Afrikën Perëndimore, kryesisht Nigeri.
Paul Raffile, ekspert IT, e përshkruan fenomenin si një “kërcënim masiv” për fëmijët.
“Mashtruesit e internetit gjatë këtyre dy viteve të fundit kanë zbuluar se mund të pasurohen shumë shpejt duke mashtruar në një treg të pashfrytëzuar”, tha ai.
Raffile vuri në dukje se të rriturit kanë qenë objektiva të shantazhimit për vite me radhë dhe tani djemtë adoleshentë janë ndër më të rrezikuarit.
“Ata po i gjejnë viktimat e tyre duke kontrolluar në platformat e mediave sociale dhe duke kërkuar shkolla të mesme e ekipe sportive të të rinjve, dhe më pas kërkojn ‘ t’i ndjekin’ ose ‘miqësi’,” tha ai.
BBC ka zbuluar se udhëzuesit se si të kryhet krimi janë në shitje në videot e postuara në internet.
Në to përshkruhet në detaje se si të vendosen numra telefoni të pagjurmueshëm, të krijohen profile të rreme të mediave sociale dhe të përdoren metoda të sigurta pagese.
Disa mburren me numrin e njerëzve që kanë shantazhuar, njëri shkruante se një viktimë e paguante rregullisht, “çdo të premte”.
Autoritetet amerikane kanë aplikuar për ekstradimin e Shanu, i cili kërkohet në shtetin e Idahos me akuzën e zhvatjes, pastrimit të parave dhe vjedhjes kibernetike.
Akuzat kanë të bëjnë me katër viktima, një prej të cilëve fëmijë.
Hetuesit besojnë se mund të ketë qindra viktima gjatë një periudhe 3-vjeçare.
Raffile thotë se kompanitë e mëdha të teknologjisë nuk po bëjnë sa duhet për të ndalur dhunën.
“Ky krim ka shpërthyer në Instagram dhe Snapchat gjatë këtyre dy viteve të fundit dhe këto platforma duhet të ndjekin në mënyrë agresive këta kriminelë,” tha ai.
Snapchat i tha BBC-së se kanë shtuar përpjekjet për ta luftuar këtë, duke përfshirë një opsion raportimi posaçërisht për kërcënimet dhe edukimin brenda aplikacionit për adoleshentët.
Në një deklaratë, Meta, e cila zotëron Instagramin, tha se ofron “një opsion të dedikuar raportimi në mënyrë që njerëzit të mund të raportojnë këdo që kërcënon të ndajë imazhe private”.
Burimi: BBC. Përshtati: Gazeta Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
