.png)
Gazeta Si – Genti Baleci, një nga personat e përfshirë në sherrin masiv me sende të forta në gusht të vitit 2024 një lokal në Palasë të Vlorës dhe i shpallur në kërkim nga policia shqiptare, është arrestuar këtë javë në Barcelonë të Spanjës për llogari të drejtësisë belge.
Pas vitesh në arrati, 49-vjeçari nga Durrësi, banor i komunës Mortsel në Anversë, u dënua me 25 vjet burg në vitin 2005 për vrasjen e një tjetër shqiptari në Schipperskwartier, Fatmir Deijaj.
Ai u lirua me kusht në vitin 2016 dhe u përfshi në krime për trafik droge një vit më vonë pas një vjedhje të një sasie kokaine.
Si u arrestua në Barcelonë
Mossos d’Esquadra, policia katalanase, ishte në gjendje të lokalizonte 49-vjeçarin Baleci të mërkurën e kaluar në lagjen “Sant Marti” të Barcelonës. Kur u arrestua, Baleci fillimisht u përpoq të jepte një emër tjetër dy oficerëve spanjollë, por pa rezultat.
Ai po mbahet në burg, në pritje të ekstradimit të tij në Belgjikë, raportojnë mediat lokale dhe se nuk dihej se çfarë bënte në Katalonjë.
Edhe pse disa media katalanase, thonë se Baleci drejtonte një organizatë kriminale në momentin e arrestimit, ai kërkohej në Belgjikë.
Ai u dënua me gati tridhjetë vjet burg atje, përfshirë për një vrasje në vitin 2001. Genti Baleci është një emër i njohur në Anversë. Në fund të viteve 1990, ai ishte përfshirë në një konflikt në mjedisin kriminal, teksa punonte si truprojë në një lokal nate.
Vrasja dhe pafajësia
Në tetor 1998, shpërtheu një sherr në kafenenë “Planet Sports” në Bisschoppenhoflaan në Deurne. Gjithashtu u qëllua dhe Tim Tubbax – atëherë një bodyguard, tani një politikan i Vlaams Belang – i cili u plagos.
Baleci u arrestua dhe u dënua së bashku me katër truproja të tjerë famëkeq. Në Apel, të pestë u shpallën të pafajshëm.
Në kohën e shpalljes së pafajësisë, Baleci ishte kthyer sërish në burg, këtë herë për një vrasje në Schipperskwartier në fillim të marsit 2001.
Atë natë, 11 plumba u qëlluan nga një “Mercedes” në drejtim të pasagjerit të një “Mitsubishi” në lagjen “Kleine Kraaiwijk”.
Pesë predha goditën kokën dhe shpatullën e viktimës Fatmir Deijaj (30 vjeç), shqiptar, i cili vdiq në vendngjarje.
Sipas dëshmitarëve anonimë, Genti Baleci dhe Afrim Beqiri u arrestuan, të dy kishin mbetje baruti armësh në veshje.
“Kriminelë të pamëshirshëm”
Faktet dukeshin si një larje hesapesh në mjedisin kriminal shqiptar, Baleci dhe Beqiri ishin truproja lokali që punonin edhe si tutorë prostitutash.
Në gjyqin e tyre në vitin 2005, ata e përshkruan veten e tyre disi ndryshe, pasi pretendonin se ishin “mbrojtësit” e disa prostitutave që nuk kishin tutor. Të dy thanë se nuk kishin asnjë lidhje me të shtënat fatale, sipas tyre, viktima ishte vrarë nga miqtë e tij.
Prokurori e pa ndryshe dhe e cilësoi Balecin dhe bashkëpunëtorin e tij si “kriminelë të pamëshirshëm që ndihen superiorë ndaj shoqërisë”.
“Ne nuk i tolerojmë bosët e mafies me ego të fryra që ecin me armë dhe ekzekutojnë njerëz pa asnjë formë gjyqi”.
Ishte një akuzë direkte, por Baleci dhe Beqiri u shpallën fajtorë dhe u dënuan me 25 vjet burg në qershor 2005.
Rrëmbehet hajduti i kokainës
Njëmbëdhjetë vjet më vonë, në dhjetor 2016, Baleci u lirua me kusht. Një vit më vonë, ai u përfshi përsëri në incidente të rënda kur një burrë i plagosur rëndë, rreth të 30-ave nga Maasmechelen, u gjet në rrugë në Zandhoven.
Edhe pse vetë ai pretendonte se kishte pasur një aksident me motoçikletë, shpejt u bë e qartë se kishte qenë në të vërtetë viktimë e një rrëmbimi dhe sulmi.
Gjithashtu nuk kishte asnjë motoçikletë që të shihej askund. Nga hetimet, rezultoi se ai dyshohej se kishte vjedhur një pjesë të një ngarkese prej 350 kilogramësh kokainë në mjedisin kriminal. Rrëmbyesit duket se ishin larguar nga shtëpia e Balecit në Mortsel në Anversës. “Ai ndihmoi në planifikimin dhe udhëheqjen e përgatitjeve”, tha gjykata në vitin 2021.
Baleci – i cili përsëri mohoi gjithçka – u dënua me katër vjet burg si anëtar i organizatës kriminale. Pikërisht për këto dyshime, ai është ende në kërkim në Belgjikë, thotë policia katalanase
Sherri në Palasë
Por Baleci besohet se e ka kaluar pjesën më të madhe të kohës në Shqipëri nga dënimi i vitit 2021 dhe pavarësisht nga arrestimi i tij javën e shkuar, telashet për të u rikthyen sërish verën e kaluar.
Më 25 gusht 2024, një sherr masiv shpërtheu në një lokal në Palasë, ku këndonte këngëtari i njohur grek, Konstandinos Argiros, në të cilin mbetën të plagosur biznesmeni Tur Koçeku dhe Fatbardh Aliaj, 42 vjeç.
Koçeku pësoi dëme të rënda në kokë. Sherri dyshohet se nisi për motive banale dhe hapjen e shampanjës që spërkati personat e gabuar në tavolinën ngjitur.
Në pamjet e sherrit dallohej që njëri prej tyre, Tur Koçeku, dhunohej barabarisht në tokë. Në atë kohë, policia shpalli në kërkim Xhoni Spahon, 28 vjeç, Genti Balecin, 49 vjeç, Fatmir Bejon, 30 vjeç dhe Klajdi Cerrin, 32 vjeç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
