Në atmosferë feste dhe gëzimi nata e ndërrimit të viteve u prit në të gjithë qytetet e vendit. Ajo që ra në sy ndryshe nga vitet e tjera, ishte hedhja e përqendruar e fishekzjarreve nga bashkitë. Vendimi i qeverisë për të ndaluar shitjen e materialeve piroteknike kësaj here ka ndikuar që në natën e ndërrimit të viteve të mos kishte shumë shpërthime kapsollash, apo fishekzjarrësh si në vitet e kaluara.
Në Sheshin “Skënderbej” ku ishin mbledhur qytetarë të shumtë për të festuar dhe ndjekur koncertin e organizuar nga bashkia, sipas Policisë për herë të parë nuk janë hedhur kapsolla.
Mbi 2500 punonjës policie kanë qenë të angazhuar në shërbim në të gjithë vendin, natën e ndërrimit të viteve.
Mbrëmë në shesh kanë qenë të pranishëm, drejtori i Përgjithshëm i Policisë së Shtetit Ardi Veliu, i cili ka ka inspektuar shërbimet e Policisë ku u kryen festimet nga Bashkia e Tiranës.
Gjatë një prononcimi për mediat Drejtori i Përgjithshëm, Veliu ka theksuar se në të gjithë vendin ndërrimi i viteve ka kaluar pa probleme, në të gjitha sheshet janë hedhur fishekzjarrë në mënyrë të organizuar dhe është për t’u vlerësuar fakti se si rezultat i masave të marra, pothuajse është zeruar hedhja e kapsollave, ndërsa paralajmëroi masa ndaj shkelësve.
Drejtori Ardi Veliu ka uruar gjithë punonjësit e policisë të cilët natën e ndërrimit të viteve e kaluan në punë dhe vijojnë të jenë në shërbim, por edhe gjithë punonjësit e Policisë së Shtetit si dhe qytetarët për bashkëpunimin dhe besimin që ata i japin Policisë së Shtetit.
Por në disa zona të Tiranës dhe në qytete të Shqipërisë ka pasur hedhje të fishekzjarrëve të pakta në numër.
Policia bën të ditur se në të gjithë vendin si rezultat i hedhjes së fishekzjarreve janë lënduar lehtë pa probleme për jetën dy shtetas, një shtetas në Tiranë dhe një shtetas në Korçë.
Qeveria mori vendimin e veçantë për të bllokuar tregtimin e lëndëve piroteknike, pas incidentit të ndodhur në nëntor, ku gjatë protestës përpara Parlamentit, u plagos policja Ina Nuka. Shkak i kësaj plagosjeje u bë shpërthimi i një kapsolle, e cila i dëmtoi pjesët e gishtave të dorës së djathtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
